O SERGAS deberá indemnizar con 60.000 euros a unha parella polo falecemento do seu bebé antes o parto

O Tribunal Superior de Xustiza de Galicia (TSXG) estimou parcialmente o recurso de apelación presentado por unha parella contra o Servizo Galego de Saúde (Sergas) e a súa aseguradora, condenándoos a indemnizar con 60.000 euros aos proxenitores pola morte intrauterina do seu bebé en novembro de 2020. A sentenza recoñece a existencia de responsabilidade patrimonial por parte da administración sanitaria.

O fallo revoga unha sentenza anterior do Xulgado do Contencioso-Administrativo número 2 de Ourense, que desestimara a reclamación. O TSXG destaca que a administración non acreditou realizar un seguimento adecuado da paciente desde a 1,00 ata as 9,00 da mañá, cando foi trasladada ao paritorio e se constatou o falecemento do feto. "Descoñécense as condicións nas que se atopaba a nai durante ese período, o que supón unha falta de control e monitorización", sinala a resolución.

Os maxistrados salientan que, dado o historial médico da muller e o seu risco de preeclampsia, era necesario un seguimento máis exhaustivo. Segundo os informes periciais, a práctica dunha cesárea no momento oportuno podería evitar o falecemento. A falta de probas que acrediten a atención prestada levou ao tribunal a considerar que se incorreu nunha situación de desatención médica.

A parella solicitara unha indemnización de 193.467 euros, pero o TSXG fixou a contía en 60.000 euros ao considerar que non se xustificaba un importe maior. A administración e a aseguradora son responsables solidarias do pago, que incluirá os intereses legais desde a data da reclamación administrativa.

A sentenza admite recurso de casación ante o Tribunal Supremo, polo que o Sergas aínda podería impugnar a resolución. Mentres tanto, o fallo reforza o principio de responsabilidade patrimonial da administración sanitaria en casos de atención deficiente.

Hospital de Ourense, CHUO. XUNTA | Fonte: Europa Press