A Xunta critica as protestas contra Altri e pregunta a Sánchez se apoiará o proxecto

A conselleira de Economía e Industria da Xunta, María Jesús Lorenzana, cualificou este sábado a protesta contra o proxecto de Altri en Palas de Rei como unha manifestación promovida polo que definiu como "comunismo do século XXI". A titular da carteira de Industria expresou estas declaracións coincidindo coa mobilización celebrada na Pobra do Caramiñal, que reuniu a milleiros de persoas e centos de embarcacións contra a instalación da planta pasteira e a mina de Touro.

Lorenzana vinculou directamente a convocatoria co Bloque Nacionalista Galego e asegurou que "as manifestacións están lideradas e animadas por parte do BNG, nada novo baixo o sol". Tamén reprochou o papel do PSdeG, ao considerar que "están a soportar a pancarta a Ana Pontón", en referencia á presenza de José Ramón Gómez Besteiro e outros cargos socialistas na marcha.

A conselleira declarou que este tipo de mobilizacións só buscan "loitar para que Galicia teña menos industria, para que os galegos sexan máis pobres e, por tanto, menos libres". E engadiu: "Xa o fixeron cos pélets, coa AP-9, con Alcoa. É a mesma historia, pero con outro nome".

En canto ao papel do Goberno central, Lorenzana lanzou unha pregunta directa ao presidente do Executivo estatal: "Señor Pedro Sánchez, ten un proxecto sobre a súa mesa. Que van facer? Van dar conexión eléctrica a este proxecto? Van dar financiamento a este proxecto?". A conselleira pediu que o Executivo responda "dentro duns expedientes administrativos" e explique "por que non chegan fondos aos proxectos galegos".

Finalmente, Lorenzana criticou que "partidos que se consideran nacionalistas e o PSdeG estean a reclamar que non cheguen fondos a Galicia", mentres, segundo indicou, "se financian proxectos noutras comunidades". A protesta na Pobra foi organizada pola Plataforma en Defensa da Ría de Arousa e reuniu a múltiples colectivos sociais e representantes políticos.