A Xunta reúnese cunha delegación estadounidense en plena crise polos aranceis de Trump
Centrouse en cuestións como as oportunidades de negocio que as empresas galegas teñen en Estados Unidos en áreas como a construción, o sector das enerxías renovables, aeroespacial ou a indsutria alimentaria
Por Europa Press / Redacción | SANTIAGO DE COMPOSTELA | 27/03/2025 | Actualizada ás 16:50
A conselleira de Economia e Industria, María Jesús Lorenzana mantivo unha reunión cunha delegación estadounidense este xoves co fin de establecer vínculos comerciais con Estados Unidos e impulsar novas formas de colaboración entre o país norteamericana e as empresas galegas.
Este encontro, promovido pola Asociación de Industrias do metal e tecnoloxías asociadas de Galicia (Asime) e a Confederación de Empresarios de Galicia (CEG) contou coa participación de representantes das embaixadas de Ohio, Virginia, Carolina do Norte, Carolina do Sur, Texas, Indiana e Pensilvania, segundo informou a Xunta nun comunicado.
Así, esta reunión centrouse en cuestións como as oportunidades de negocio que as empresas galegas teñen en Estados Unidos en áreas como a construción, o sector das enerxías renovables, aeroespacial ou a indsutria alimentaria. Respecto ao novo panorama internacional, no que a Xunta prevé que en Galicia o efecto dos posibles aranceis sexa limitado, Lorenzana puxo en valor o traballo do Goberno galego para manter a competitividade das empresas, mediante a innovación, a internacionalziación e a promoción dos seus produtos.
Ademais, destacou o novo observatorio de vixilancia por antena que o Instituto Galego de Promoción Económica (Igape) desenvolveu en Estados Unidos, que entre outras funcións, permite facer un seguimento das políticas comerciais e asesorar, apoiar e informar as empresas galegas para que se adapten aos novos escenarios económicos. Galicia constitúe a quinta comunidade autónoma de España que máis produtos exporta a EEUU. O ano pasado, un milleiro de empresas galegas, 350 delas de forma regular, exportaron ao país norteamericano por un importe de 800 millóns de euros, é dicir, o 2,6% do total de exportacións da comunidade galega.
