Un godello de Valdeorras premiado con 100 puntos na Guía Gourmets

Un Godello da Denominación de Orixe Valdeorras foi seleccionado como un dos dous mellores brancos de España na primeira edición dos Premios Liga del 100 da prestixiosa Guía Vinos Gourmets. O galardón foi outorgado a Sorte O Soro 2023, da adega Rafael Palacios, que é un dos nove únicos viños, de seis denominacións diferentes a nivel nacional, aos que o comité de cata premiou con 100 puntos sobre unha escala de 100.

Segundo explican desde a organización, trátase da primeira vez que esta Guía, que chega en 2025 á 40ª edición, concede a máxima cualificación, outorgada por unanimidade dos seus membros, “a viños sublimes, que sobresaen pola súa marcada personalidade, elegancia, cualidades excepcionais e que merecen o máximo recoñecemento”.