O 061 pide precaución nas estradas e lembra os 62 accidentes da Semana Santa de 2024
Por Europa Press / Redacción | SANTIAGO DE COMPOSTELA | 16/04/2025 | Actualizada ás 13:00
Urxencias Sanitarias de Galicia-061, o servizo que coordina e xestiona as urxencias e emerxencias sanitarias, pediu á condutores precaución nas estradas ante o inicio dos desprazamentos polas vacacións de Semana Santa.
Nun comunicado, lembra que, cando se produce un accidente de tráfico, a persoa que se atopa no lugar do sinistro pode ser de gran utilidade. "En primeiro lugar, facilitando ao 061 toda a información relevante, e despois, seguindo as indicacións transmitidas polo persoal sanitario da Central de Coordinación do 061 de Galicia ata a chegada dos recursos especializados".
"Nestas situacións, resulta fundamental o uso da App Sergas Móbil para chamar ao 061 porque permite geolocalizar a chamada e axilizar así a asistencia no punto do sinistro". "Para isto, deberá rexistrarse na App con anterioridade e facer a chamada desde a pestana laranxa", explica.
Por outra banda, incide en que "antes de auxiliar nun sinistro de tráfico, débese tratar de aparcar o coche nun sitio seguro, afastado do accidente e prender as luces de emerxencia; pór roupa reflectora ou rechamante, pero nunca escura; e, por último, sinalizar o accidente cos triángulos de sinalización ou coa luz de emerxencia V-16".
"O que non se debe facer nunca é pór en perigo a propia vida". "Para iso, antes de atender aos accidentados, hai que adoptar as medidas de seguridade idóneas, para evitar novos accidentes". "Igualmente, e salvo que haxa perigo de incendio ou novas colisións, non se debe mover a ningún ferido, xa que poderían agravarse as súas lesións", apostila.
SEMANA SANTA DE 2024
En canto ao balance da Semana Santa de 2024, Urxencias Sanitarias de Galicia-061 asistiu a 78 persoas debido a 62 accidentes de tráfico ocorridos nas estradas galegas. O período contabilizado comprende desde as 15.00 horas do mércores, 27 de marzo, ata as 23.59 horas do domingo, 31 de marzo de 2024. O maior número de atencións por sinistros rexistrouse o sábado con 17 accidentes. A Central de Coordinación do 061 recibiu neses días 83 chamadas en relación cos accidentes de tráfico.
