A Plataforma Ulloa Viva celebra que Altri non reciba axudas de descarbonización mais avisa que hai máis fondos
Para a Plataforma é "importante" coñecer os criterios de denegación xa que o "incumprimento dos principios de non causar daós significativo é un criterio transversal que podería comprometer a concesión doutro tipo de liñas"
Por Europa Press / Redacción | SANTIAGO DE COMPOSTELA | 23/04/2025 | Actualizada ás 15:02
A portavoz da Plataforma Ulloa Viva, Zeltia Laya, afirmou que "están moi contentos" polo anuncio do Goberno sobre que o proxecto de Altri en Palas de Rei non recibe as axudas do Perte de Descarbonización Industrial, pero mantéñense en alerta porque a empresa ten solicitados outros fondos.
"Estamos moi contentas por esta noticia. Consideramos que é un paso máis cara á non posible realización desta macrocelulosa, pero ao mesmo tempo estamos en alerta porque, tanto a empresa como a Xunta, segue animando a que a instalación é posible por ter solicitadas outra vía de financiamento que si poderían cubrir os fondos necesarios", sinalou en declaracións remitidas aos medios.
Con todo, subliñou que "non hai que esquecer" que o proxecto Altri "depende de dúas resolucións" que "serán outorgadas pola Xunta con independencia de que teña ou non financiamento de axudas da Unión Europea".
Para a Plataforma é "importante" coñecer os criterios de denegación xa que o "incumprimento dos principios de non causar daós significativo é un criterio transversal que podería comprometer a concesión doutro tipo de liñas".
Neste contexto, a Plataforma remarcou que, para "parar a macrocelulosa", un dos factores "máis importantes" segue sendo a mobilización social e lembrou que o 4 de maio celebrarase unha baixada polo río Ulla e o 8 de maio terá lugar unha concentración ante o Congreso dos Deputados.
