Feridos dous veciños de Ortigueira por un ataque de vespas velutinas
Recibiron numerosas picaduras cando rozaban a maleza da vivenda dun deles. O GES de Ortigueira foi mobilizado para retirar o niño.
Por Galicia Confidencial | Ortigueira | 03/09/2016 | Actualizada ás 12:00
Dous veciños de Ortigueira tiveron que ser atendidos este venres nun centro hospitalario tras ser atacados por un enxame de vespas velutinas que lle produciron numerosas picaduras.
Estes dous homes, veciños do lugar de Outeiro, na parroquia ortegana de Barbos, de 50 anos e 30 anos, foron atacados polas vespas cando se atopaban limpando a maleza próxima á vivenda. Ao cortar unhas gallas dunha figueira esnaquizaron un niño de vespas velutinas que, inmediatamente, os atacaron.
Tras recibir numerosas picaduras foron trasladados ao Centro de Saúde de Ortigueira onde foron atendidos. Posteiormente,o Grupo de Emerxencias Supramunicipal-GES- de Ortigueira desprazouse ao lugar para facerse cargo do niño. As vespas acumuláranse nunha das xanelas da vivenda, onde comezaran a armar un novo niño.
Con este son xa 350 os niños os retirados polo GES de Ortigueira, logrando o récord neste labor en toda a provincia.
