Últimos movementos no PSdeG
O sector de Abel Caballero pretende chegar a un acordo co presidente da Deputación da Coruña, Valentín González, sobre o futuro do partido en Galicia. Nin Pilar Cancela, nin a nova xestora do PSOE en Madrid moven peza polo momento.
- Os socialistas galegos miden forzas
- Formoso avoga por convocar un congreso en lugar de "cambiar unha xestora por outra" no PSdeG
Por Galicia Confidencial | Compostela | 14/11/2016 | Actualizada ás 14:00
Valentín González, presidente da Deputación da Coruña, e Abel Caballero, alcalde de Vigo, representan hoxe por hoxe os dous polos encontrados do PSdeG; dous polos divididos, pero sobre os que os dous grupos pretende impulsar un entendemento.
Por iso, nos últimos días aumentaron os contactos entre o sector de Caballero e o de González Formoso. Primeiro foron chamadas telefónicas e logo encontros presenciais en caferías. Así aconteceu, primeiro, entre o presidente do organismo provincial coruñés e José Blanco hai dúas semanas, tal e como xa contou GC, e despois entre Valentín González e Abel Caballero xa a pasada semana.
E é que estes dous dirixentes políticos son, hoxe por hoxe, os portavoces das diferentes sensibilidades socialistas. Nin Pachi Vázquez, nin Carmela Silva, nin o propio Caballero consideran xa a Pilar Cancela, presidenta da xestora, unha interlocutura válida para tentar solventar as diferencias que existen dentro do PSdeG. Tampouco a Xoaquín Fernández Leiceaga, actual voceiro parlamentario.
Sen acordos
Neses encontros falouse da situación interna do PSdeG e do PSOE, pero non se chegou a ningún acordo concreto. O sector de Abel Caballero quere que dimita, canto antes, Pilar Cancela para que se nomee unha nova xestora. Pero iso, non está enriba da mesa no sector crítico. Así o deixou claro Valentín González que é partidario de non abrir novas frontes. Aposta por convocar, canto antes, un congreso federal para, logo, inmediatamente, convocar outro en Galicia. Esa é a folla de ruta do, agora, sector crítico.
Ademais a actual xestora que preside Javier Fernández baralla, polo momento, a destitución de Cancela, xa que abriría en Galicia outra fronte que, polo que se ve nas conversas entre os distintos sectores, podería desembocar nunha nova guerra interna.
A única solución que cabería, polo momento, sería a entrada na actual xestora galega de cargos afíns a Caballero. Esa tería sido a posibilidade na que se tería avanzado na xuntanza entre Caballero e Valentín González. Unha solución que, a priori, tampouco convence aos dous sectores.
Tamén se tería falado, segundo as fontes consultadas, de tentar "pacificar" ou, cando menos, "enfriar" as diferencias deste partido en Galicia, evitando enfrontamentos entre sectores. Sen embargo, tampouco aquí parece que se teña chegado a ningún acordo logo do acontecido hai uns días na Deputación de Ourense, coa destitución do ex portavoz neste organismo provincial, Ignacio Gómez, afín ao sector de Cancela, e o nomeamento de Luis Fraga, afín a Pachi Vázquez.
