Guerra de relixión en Lalín

O Concello de Lalín aprobaba hai oito meses unha moción presentada polos grupos que forman parte do goberno local para impulsar a laicidade e separar a vida política da vida relixiosa. Oito meses despois, os populares contraatacan con outra moción para suprimir esa norma e facer que o pleno municipal “recoñeza as raíces cristiáns e católicas” do pobo de Lalín.

Rafael Cuíña e Román Rodríguez nunha procesión en Lalín | Fonte: laicismo.org

A Constitución Española garante a liberdade ideolóxica, relixiosa e de culto dos individuos e as comunidades no seu artigo 16 e establece que ningunha confesión terá carácter estatal. Precisamente, iso foi o que quixo ratificar a moción aprobada polo pleno de Lalín o pasado abril e que, agora, o PPdeG, entende que está causando división entre os veciños do pobo.

José Crespo, ex rexedor popular, asegura nunha nova moción presentada o pasado 17 de decembro no concello, que a iniciativa aprobada en abril “é de discutible legalidade” e trata materias que “non son competencia municipal” e deberían ter un pronunciamento dos técnicos do concello. “Supón un intento de adoutrinamento por parte dun moi minoritario sector da cidadanía de Lalín que tenta impoñer á maioría unha ideoloxía de signo marcadamente ateo que non se corresponde coa nosa cultura e tradicións, e contradí un xeneralizado consenso social que existe ao respecto”, suliña.

CRÍTICAS AO ISLAM

Ademais, Crespo critica que, a pesar da aprobación desa norma, tanto o rexedor, Rafael Cuíña, como os concelleiros de CxG, asistiron a actos relixiosos como “representantes oficiais” do concello e que “ocuparon lugares de privilexio” nas misas, e cre que deberían asistir “como un veciño máis e a título individual”. Por iso, considera de “falta de seriedade” a postura dos membros do goberno lalinense.

Rafael Cuíña e Xosé Crespo | Fonte: mundiario.com

O ex rexedor popular tamén lembra que o foi o Cristianismo o que  introduciu na historia, “como novidade absoluta”, a independencia da relixión respecto do poder político, “o que non ocorre no Islam”. De feito, critica aos membros do goberno de Lalín de non facer alusión a esta relixión na súa moción, e si ao Catolicismo.

Por iso, pídelle novamente ao concello que declare nulo o acordo de abril e volva manter coa Igrexa Católica “as mesmas relacións e colaboracións que había ata antes de aprobar dita moción” porque representa “os valores democráticos de xustiza, igualdade, liberdade e respecto” que, di, “lamentablemente non están presentes noutras confesión relixiosas”, en alusión ao Islam. 

MOCIÓN LAICISTA

A moción aprobada polo cuatripartito en abril promovía a “liberdade de conciencia e a non confesionalidad institucional” do Concello de Lalín para outorgarlle ás institucións de carácter público “a calidade de aconfesionais”, co fin de que “non exista ningunha confusión entre os fins civís e públicos -que afectan a toda a cidadanía- e os relixiosos ou ideolóxicos de carácter particular”. 

O executivo lalinense xustificou esta proposta en que pretende garantir a liberdade de conciencia e a independencia da administración pública, tal e como recolle a Constitución Española. Así, a proposición aprobada recollía a supresión dos símbolos relixiosos nos actos oficiais e espazos de titularidade pública. Ademais, obriga á Alcaldía a que todos os seus edificios e dependencias estean “exentos de calquera tipo de simboloxía relixiosa ou doutra natureza ideolóxica” para cumprir coa neutralidade que se presupón á administración pública.

Tamén estipula que os actos oficiais serán exclusivamente civís, sen connotacións relixiosas ou ideolóxicas. Así, desde o Concello non se organizarán honras ou votos públicos a advocacións, santos, imaxes ou simboloxía relixiosa. Tampouco os membros da corporación local e o persoal ao servizo da administración municipal poderá mostrar, no exercicio do seu cargo ou as súas funcións, ningún xesto de veneración relixiosa. Aínda que, isto non impediría a presenza dos membros da corporación en actos relixiosos como a tradicional ofrenda con motivo das festas patronais. Neste sentido, especifican que os representantes eclesiásticos de calquera confesión “non serán convidado, en calidade de autoridade pública, a actos civís”.