R di que comeza a pagar aos seus clientes pola avaría de Nadal
A compañía insiste en que o culpábel do sucedido foi Vodafone por mandar SMS a eito. Con todo, promete devolver até 4,12 euros por liña.
- R responsabiliza a Vodafone da caída do seu servizo de telefonía móbil
- Vodafone nega a acusación de R de estar detrás da caída da súa rede e critica que se use como "xustificación"
Por E.P. | SANTIAGO DE COMPOSTELA | 25/01/2017 | Actualizada ás 20:15
A compañía R comezou a aboar aos seus clientes a compensación pola avaría masiva que afectou ás liñas móbiles durante horas entre o 23 e o 24 de decembro.
Así, R aplica na tarifa de xaneiro aos seus clientes un desconto de cinco veces o período polo cal non puideron facer chamadas nin usar Internet nos seus móbiles.
De tal forma, a compensación que aplica R aos seus clientes nas súas tarifas van dende os 1,10 euros ata os 4,12 euros -en función do plan de voz e datos que teña contratado cada cliente-, segundo informan a Europa Press fontes das compañía.
R asegurou no seu momento que "a causa da incidencia" se debeu a "un aumento desproporcionado do tráfico de SMS dirixidos a clientes de R como consecuencia dun envío masivo de mensaxes do operador Vodafone".
Non obstante, Vodafone saíu ao paso das "graves, inxustificadas e irresponsables acusacións" de R, e dixo "ter a firme convicción de que nada ten que ver con esta incidencia", pois o envío de SMS cursados dende a rede de Vodafone á rede de R "non é significativo".
