Propoñen crear un mapa de risco de incendios cun sistema de alerta en bosques

O catedrático de Xeografía Física da USC Augusto Pérez Alberti, propón elaborar un mapa de riscos de lumes en Galicia vinculado cun sistema de alerta en áreas con masas forestais. Na comisión parlamentaria de estudo dos incendios forestais, Pérez Alberti subliñou que é "fundamental" elaborar un mapa coma este para "evitar problemas como os que se viviron nos últimos incendios" en Galicia. Desta maneira estarían cartografiados "con detalle" aqueles asentamentos próximos a masas arbóreas. E subliñou que "non é complicado facelo".

O catedrático da USC avoga por que "todo" estea reflectido nun sistema de información xeográfica, o cal "permite saber onde está cada cousa e onde hai un perigo". Ademais considera que "sería interesante" crear unha rede de medición debaixo de masas forestais para coñecer humidades e temperaturas do chan. Así habería un sistema de alerta co que saber "en tempo real" que lugares en zonas de risco están en condicións "de estrés" para previr os lumes.

Respecto diso, referiuse a unha experiencia piloto con 11 estacións, desde Cíes ao Ribeiro. Pérez Alberti vería que así se poden obter bos resultados se se combina unha "boa cartografía" e un sistema de alerta.E avisou que  "ou se cambia todo o sistema ou vai haber incendios continuamente".

O 78% FORON ONDE "SE SABÍA QUE PODÍA ARDER"

"Pódese ter un coñecemento do que pode acontecer", reflexiona este experto. Pon como exemplo o traballo dun doutorando seu, Alejandro Gómez Pazo, que realizou un mapa de perigo de inicio de lume en función dunha serie de variables como as entrópicas, climáticas, substitución e chan.

O estudo de Gómez Pazo "coincide" nun "78%" dos 900 puntos de lume no sur de Galicia durante os incendios de outubro de 2017, pois son lugares onde se sabía que "podía arder", explica Pérez Alberti. Logo de analizar  eses lumes, un 40% do total de 900 incendios correspóndese con piñeiros (207 casos) e eucaliptos (132).

Pérez Alberti admitiu que "é imposible cambiar dun día para outro" a produción forestal en Galicia, pero advirte de que "hai que diversificar" e "cambiar o monocultivo", no canto desta "obsesión por piñeiro e eucalipto". Unha problemática que se suma a un territorio "desordenado", que creceu de "modo caótico". Pon de exemplo a seguir a diversificación de especies no rural francés, á vez que defende que "non todo ten que estar pensado no mercantilismo".

SEN DATOS DE CARTOGRAFIADO DE INCENDIOS

Precisamente, Pérez Alberti lamentou a dificultade que tivo Gómez Pazo para atopar a información sobre incendios, xa que criticou que "non hai datos" da Xunta de cartografiado dos lumes que se producen, o que dificulta os labores de prevención para o futuro.

Contrapón este caso co de Portugal, onde se poden consultar na web completos cartografiados de todos os lumes de cada ano. En Galicia, a Xunta non ofrece esta posibilidade, a pesar de ser unha esixencia da "lexislación europea", que "o di moi claro".

"É necesario ter unha información clara e precisa de cartografía dos incendios forestais", advirte. "De existir, está escondida", dado que non é de "acceso libre" como ocorre en Portugal. "Cando queremos saber exactamente onde ardeu non o sabemos", lamenta.

A CIG CARGA CONTRA A POLÍTICA DA XUNTA

Por outra banda, nesta xornada de luns da comisión de estudo de incendios tamén participou o secretario xeral da CIG, Paulo Carril, quen cargou contra as políticas do PP e Xunta en materia forestal e de incendios.

Neste sentido, alerta de que nunha década do vixente plan forestal o eucalipto aumentou a súa superficie un 81% ata supoñer 433.000 hectáreas, cando se prevían 245.000, aínda que di que estimacións falan de que en 2016 había xa 500.000 hectáreas. Por iso, cargou contra o proxecto do futuro plan forestal da Xunta, o cal, "entre outros importantes fallos", non se expón unha redución do eucalipto, senón "un aumento de 40.000 hectáreas".

Carril censura a "política de eucaliptización" da Xunta, que "destrúe explotacións en beneficio de multinacionais" e dá lugar a unha "desertización". A isto únese que na revisión do plan forestal fálase do Pladiga sen unha "mínima crítica ao seu funcionamento", que "é nefasto". Quéixase de que non se expón un borrador do Pladiga con tempo suficiente deste texto, que se aproba no mes de xuño -ás portas do período de alto risco-- con medidas preventivas "inútiles", mentres "non se fan análises do que se cumpre".

UN SERVIZO DE EXTINCIÓN ÚNICO E PÚBLICO

Así mesmo, o secretario xeral da CIG reclama unha "reformulación radical" do servizo de extinción, coa súa unificación nun só ente de carácter público, que sexa profesional, durante todo o ano e do que se exclúan ás empresas privadas. Paulo Carril deixa claro que as causas dos incendios en Galicia "teñen responsables", das que responsabilizou á "incompetencia" do PP e a Xunta, polo que cre que deben "depurarse responsabilidades políticas".

Sobre este extremo, arremeteu contra a "desorganización absoluta" no actual dispositivo de extinción, no que hai unha "precarización" dos seus traballadores. A continuación, incidiu en que a solución pasa por un servizo público e único, no canto de que haxa 1.500 prazas en concellos por tres meses, con brigadas formadas maioritariamente "por xente sen experiencia", que "na maioría dos casos non se dedica a extinción".

Por todo iso, o líder sindical defendeu a Iniciativa Lexislativa Popular ( ILP) que promove a Alianza por un Rural Galego Vivo, que demanda un "cambio radical e urxente" das políticas do Goberno autonómico. Estas palabras de crítica á Xunta e o PPdeG valéronlle a Carril unha reprimenda do deputado popular José González, quen lle afeou que "confundiu o sentido desta comisión", que ao seu xuízo pasa por facer propostas e non "vir dicir que está todo mal".