Ana Miranda reclama sancións internacionais a Turquía pola súa represión cos curdos en Siria

A eurodeputada do BNG Ana Miranda denuncia a operación armada “ilegal” que Turquia está levando a cabo no cantón curdo de Afrin, en Siria, e na que está utilizando “terroristas e islamitas” para conquistar esta zona. Por iso, pide sancións internacionais para o país otomano.

En declaracións a GC logo dunha semana “intensa” na súa volta á Eurocámara na que non tivo moito tempo para atender aos medios de comunicación, Miranda suliñou que este mesmo luns participou nunha concentración na Eurocámara, xunto con outros eurodeputados, para denunciar o operativo turco en Afrin. Ademais, lembrou que a pasada semana votouse unha resolución sobre Siria no Parlamento Europeo o que se instaba a Turquia a rematar coa súa ofensiva armada.

“Esa –o cantón de Afrin-- era unha zona moi estable e tiña a súa propia autonomía. De feito, tiña acollido a moitos refuxiados”, apunta Miranda que asegura que o operativo militar turco foi para “desestabilizar aínda máis Siria”. De feito, nesa zona vivían “pacificamente” diferentes comunidades étnicas; árabes, curdos, iazidies, crisiáns, siriacos ou turcómanos, ata o inicio da ofensiva turca.

Por iso, a eurodeputada do BNG pídelle á UE que poña en marcha sancións económicas contra Turquia, que se remate o comercio de armas con este país -- “porque moitas delas acaban en mans dos terroristas do Daehs”-- e aprobe sancións “de embergadura”.  Ademais, denuncia que o nacionalismo islamita turco está poñendo en perigo o “movemento de igualdade” que existe no Curdistan no que as mulleres teñen os mesmos dereitos que os homes e “mesmo participan na guerra en unidades militares.

Sobre os milleiros de refuxiados que xerou un conflito que a pasada semana entrou xa nos sete anos de guerra, Miranda apostou por buscar unha "solución dialogada" a unha situación que provocou o que chamou un "acordo da vergoña" entre as potencias internacionais. "Europa debe de cumprir a súa parte e acoller refuxiados e buscar unha solución negociada ao conflito", asegurou. Unha postura que comparten os outros partidos da Cámara galega.