Medio Rural considera "cubertas" as demandas dos axentes forestais

A conselleira de Medio Rural, Ángeles Vázquez, considerou "cubertas" as demandas dos axentes forestais ante a convocatoria de folga no sector. Ao contar cuns servizos mínimos do 100%, non terá efectos prácticos. Así o apuntou tamén a conselleira, a preguntas dos xornalistas, tras unha reunión co delegado do Goberno en Galicia, Javier Losada, para abordar a coordinación na loita contra os incendios.

Sobre o paro dos axentes forestais, e despois de que os ambientais suspendesen o paro indefinido, a titular de Medio Rural dixo que é "inexistente" ao fixarse os servizos mínimos do 100%. Ademais, xustificou que se estableceron na súa totalidade "porque se está no alto risco" de incendios.

Con todo, ofreceu "diálogo" por parte da Xunta, aínda que incidindo en que as demandas que expoñen os axentes forestais están "cubertas". "E son incentivos económicos que van de 4.400 a 5.300 euros anuais e conciliar a vida familiar e laboral", un aspecto que dixo que se conseguirá con gardas localizables e non presenciais.

A iso, sumou "a entrega de coches novos, tarifa plana nos seus móbiles e tablets". Mentres, cuestionada sobre a necesidade de máis persoal, remitiuse á convocatoria de oposicións "este ano e o próximo".