En Marea quere "maior compromiso" do Goberno central para comprar o Centro Galego de Buenos Aires

En Marea solicita un "maior compromiso" por parte do Goberno central despois de que este rexeitase adquirir o Centro Galego de Bos Aires (Arxentina), que tamén proporciona asistencia sanitaria aos emigrantes galegos e que foi intervido pola xustiza arxentina tras un proceso de acumulación de débeda. A través dunha resposta parlamentaria, o Executivo de Pedro Sánchez anuncia que, "a pesar de observar a situación do Centro con evidente preocupación, polo momento non se contemplaría a posibilidade" de que o Ministerio de Asuntos Exteriores, Unión Europea e Cooperación (MAUC) adquira a institución.

Así, segundo denuncia o parlamentario de En Marea no Congreso Miguel Anxo Fernán Vello, o Goberno "se escuda no feito de que a titularidade do Centro non lle corresponde", senón que participa, igual que a Xunta, na xestión de Ospaña (Obra Social de Españois en Arxentina) a través do seu consello directivo, que dirixe tamén o Centro Galego. Ante iso, En Marea considera, nun comunicado, que o tema "vai máis aló de cuestións formais", xa que "hai unha débeda" das administracións "para cos miles de galegos e galegas que tiveron que emigrar". "É hora de acabar con ese esquecemento e compensalos", propón Fernán Vello.

Ademais, o deputado censura que o Goberno "non fai alusión concreta" á asistencia sanitaria do Centro, xa que, segundo se desprende da resposta, "os galegos en Arxentina que poidan ter algunha dificultade para seguir recibindo asistencia sanitaria teñen distintas alternativas á súa disposición". Fernán Vello considera que a resposta "se reduce a bonitas palabras de recoñecemento" da institución, pero "elude calquera compromiso e non explicita posibles cuestións nin pon sobre a mesa medidas de cooperación coa Xunta" para tentar reflotala.