Dura denuncia contra o líder dos Miguelianos: "Facía espiritismo e cometeu abusos sexuais"

A muller que exercía como fiscal da Orde e Mandato de San Miguel Arcángel, e que na causa dos 'Miguelianos' ten a dobre posición de acusada e prexudicada, sostivo que o líder, Miguel Rosendo, practicaba espiritismo, videncia e exorcismos; e relatou pormenorizadamente diversos episodios de control e de abusos sexuais sobre ela e outros membros da Orde.

Na súa declaración deste venres, na Sección Cuarta da Audiencia Provincial de Pontevedra, a muller explicou que coñeceu a Rosendo como a un "vidente", e que na súa consulta chegou a vivir diversas situacións nas que el "entraba en transo", facía rituais e falaba "linguas que non entendía". "Primeiro era un vidente e logo un home relixioso de camiño á santidade", resumiu.

Como exemplo das consultas, explicou que nunha ocasión decenas de persoas presenciaron como el facía espiritismo, e nun momento dado cambioulle a voz e entrou nunha especie de transo na que chegou a romper a camiseta e "mostrou o seu torso manchado de vermello". "Enténdese que de sangue", dixo a muller, que comentou que os asistentes responderon axeonllándose e gritando 'aleluia'.

A continuación, describiu numerosos episodios sexuais, os cales indicou que Miguel Rosendo denominaba como "traballos". Segundo mantivo, estas situacións déronse en varias ocasións ao longo dos anos, e empezaron por abrazos "con moita forza" nos que el lle repetía: "Entra dentro de min"; e chegaron a ser relacións nas que participaron varias persoas da Orde.