O PP gañaría en Galicia e o PSOE en España, segundo unha enquisa
En Galicia, En Marea sufriría un forte descenso, C's volvería sacar representación e o BNG seguiría sen ningún escano. No conxunto do estado, a ultradereita podería colocarse como terceira forza máis votada.
Por Galicia Confidencial | Compostela | 24/02/2019 | Actualizada ás 11:21
O PSOE gañaría un escano respecto das eleccións de xuño de 2016, até 7 en total en Galicia (27 % de voto), aínda que o PP seguiría sendo o vencedor con 11 escanos, un menos, e unha porcentaxe de voto do 34,1. Ese sería o resultado das Xerais en Galicia segundo unha enquisa elaborada pola empresa Sondaxe para La Voz de Galicia.
Ademais, En Marea caería de 5 a 3 deputados, cun 17,7 % dos votos, e Ciudadanos conseguiría novamente representación no Congreso, tras o efímero escano acadado nas eleccións do 2015. Pero, esta volta, duplicaría os resultados, con dous escanos, un na Coruña e outro en Lugo, tras facerse cun 10,1 por cento dos votos.
A enquisa realizouse entre o 13 e o 21 de febreiro sobre unha mostra de mil entrevistas para o conxunto de España, cunha marxe de erro do 3% e de 500 entrevistas para Galicia, cunha marxe de erro do 4,47 por cento. En todo caso, non ten en conta a posibilidade de que En Marea se divida en dúas formacións diferentes, nin a posibilidade de que haxa coalicións electorias na esquerda de última hora.
ESPAÑA
Polo que respecta ao conxunto do Estado, o PSOE gañaría as eleccións con 116 escanos (31 máis) e o 28,2 por cento dos votos; mentres que o PP sería a segunda forza con 76 escanos (61 menos) e un 19,3 por cento dos votos.
Os resultados desta enquisa que apuntarían a unha situación de bloqueo político tras os comicios, segundo o diario galego, outorgan a terceira praza a Vox, cunha forte irrupción de 51 deputados e o 14,2 por cento dos votos.
Ciudadanos obtería 40 escanos (8 máis) e o 13,5 por cento dos votos e Unidos Podemos e as súas confluencias caerían á quinta forza con 39 actas (22 menos) e o 14,2 por cento dos votos, segundo a enquisa de Sondaxe.
ERC conseguiría 14 actas (5 máis) e o 3,8 por cento dos votos; o PdeCat faríase con 6 escanos (2 menos) e o 1,7 % dos votos; o PNV obtería 6 escanos (1 máis) co 1,4 por cento das papeletas e EH-Bildu conseguiría 2 escanos (os mesmos) co 0,8 por cento de votos.
