Javier Guerra aparece na celebración da vitoria de Feijóo mentres Cs di non ter pechada a súa candidatura

O exconselleiro de Economía e Industria da Xunta de Galicia, Javier Guerra, reapareceu nun acto do Partido Popular, o de celebración do décimo aniversario da primeira vitoria de Feijóo na Xunta, mentres se manteñen as incógnitas sobre o seu suposto achegamento a Ciudadanos. A portavoz de Cs en Galicia, Olga Louzao, recoñeceu só que "existiron conversacións" pero que non hai nada pechado polo momento.

Este mesmo venres, La Voz de Galicia publicou que Ciudadanos ofrecería a Guerra ser candidato pola provincia de Pontevedra para as eleccións xerais, coa finalidade de que fose candidato á Xunta o próximo ano. E precisamente este venres Javier Guerra acudiu ao acto do PP ao que estaba convidado como exconselleiro. Segundo fontes do partido, segue sendo militante "popular".

Javier Guerra sentouse nunha das primeiras filas, xusto detrás da que ocupaba Feijóo e a vicesecretaria de comunicación do PP, Marta González, xunto con catro presidentes provinciais. E colocouse entre os actuais conselleiros de Cultura, Román Rodríguez, e de Educación, Carmen Pomar, nunha fila na que tamén estaban os titulares de Facenda e de Infraestruturas.

Preguntado polos medios de comunicación pola súa presenza no Hotel San Francisco de Santiago onde se desenvolvía o evento, Javier Guerra só explicou que acudía por estar convidado como exconselleiro. Con xestos, rexeitou contestar á pregunta de se sería o seu último acto co PP ou sobre as informacións que o vinculan con Cidadáns. Á súa chegada, Alberto Núñez Feijóo saudou aos membros do PP que se atopaban nas primeiras filas e, entre eles, tamén a Javier Guerra, a quen saudou. O exconselleiro asistiu así a todo o acto pero foi un dos primeiros en abandonalo, pouco despois de que Feijóo finalizase a súa intervención.

CS CONFIRMA CONVERSACIÓNS 

Pola súa banda, a portavoz de Cs en Galicia, Olga Louzao, recoñeceu que "existiron conversas" co exconselleiro de Industria Javier Guerra, pero asegurou que non hai nada pechado para formar parte das listas do partido. Ante a información publicada en La Voz de Galicia, Louzao afirmou que "non consta que Javier Guerra estea aínda en Ciudadanos". "Vimos tamén moitas máis noticias nas que tamén se falaban de nomes que, por un motivo ou por outro, non foron reais; por tanto, cando haxa que anunciar anunciarase".

"Nunca negamos que existisen conversas con Javier Guerra como con moitas outras persoas que ao final deron o paso e outras que aínda non o deron", agrega. De tal forma, insiste en que "aínda non se saben os nomes dos candidatos", polo que no seu momento "anunciarase" quen serán. Incidiu en que Guerra "ten unha experiencia e bagaxe política e profesional", aínda que "leva apartado do política seis anos". Con todo, subliña que "calquera persoa" se "vén achegar, se vén sumar", aínda que "non teña o nome e a experiencia de Javier Guerra, será benvido".