Todos os partidos piden que se axilice a mesa de traballo con Poligal e para que Vulcano pague aos empregados

O Parlamento galego aprobou por unanimidade senllas propostas do BNG e PSdeG co fin de que, respectivamente, se axilice a mesa de traballo da Xunta con Poligal, así como para que o Goberno galego busque un acordo con Vulcano co fin de que se abone o que debe a traballadores e empresas auxiliares.

Na comisión de Industria, saíu adiante a proposta do Bloque pola que se empraza a que a mesa de traballo da Xunta para o mantemento do emprego na fábrica de Poligal, en Narón (A Coruña), se realice con "axilidade e periodicidade nas súas reunións".

A deputada do BNG Noa Presas censurou "a lentitude" da Xunta para actuar ante un "claro exemplo de deslocalización" por parte de Poligal, cun concurso "fraudulento". E é que reprocha que o Goberno autonómico xa se comprometeu hai máis de 15 días a formalizar a mesa, mentres avisa de que os traballadores están "en tempo de desconto".

Por outra banda, toda a Cámara apoiou unha proposta socialista pola que se empraza á Xunta a tomar a iniciativa para reunir a todas as partes implicadas na situación de Vulcano e se alcance un acordo que permita aos traballadores cobrar os salarios que lles deben, así como o pago a provedores e empresas auxiliares.

O socialista Abel Losada chamou a atención sobre a "situación crítica" que vive o estaleiro, mentres o persoal acumula cinco nóminas impagadas e sen garantías de financiamento para terminar o ferry actualmente en construción. Por iso, empraza á Xunta a actuar porque a súa implicación "é cero".

Nesta comisión tamén houbo outro acordo unánime, neste caso tras unha iniciativa de En Marea, pola que a Cámara insta á Xunta a solicitar a retirada do ERTE de Bosch no seu centro de Vigo para garantir o mantemento dos postos de traballo.

Así mesmo, empraza a establecer unha mesa de traballo cos representantes de traballadores e empresas das que contratan os seus servizos neste sector do telemarketing para chegar a acordos.