A valedora atrincheirase no seu posto e quere tamén que dimita o vicevaledor

A valedora do Pobo, Milagros Otero, defendeu que a súa renuncia condicionada a que os grupos parlamentarios teñan substituto do seu cargo e do seu adxunto, adoptouna por "responsabilidade" coa institución comisionada. Con todo, e tal e como xa avanzou este xoves GC, a súa estratexia e a do PP pasa por obrigar á oposición a un difícil pacto que, de facto, provocará que continúe no cargo de xeito indefinido.

A valedora alega 'responsabilidade' na súa dimisión condicionada e defende renov | Fonte: Europa Press

E é que Otero pide que con ela tamén dimita o seu adxunto, Pablo Cameselle, que foi proposto polo PSOE, porque xuntos forman un "equipo". Noutras ocasións, precisamente, o vicevaledor foi o que asumíu interinamente o cargo tras a renuncia do valedor, como acontecu con Benigno López. Os populares buscan deste xeito, que unha persoa afín ao PSOE, asuma este cargo.

Despois de coñecerse que o Tribunal Supremo non admitiu o recurso presentado, e por tanto, ratificou a sentenza do Tribunal Superior de Galicia na que declaraba nulo o nomeamento dentro da institución de María Puy Fraga, irmá do portavoz parlamentario do PPdeG e sobriña do expresidente Manuel Fraga, Otero enviou ao Parlamento de Galicia unha carta na que puxo o seu cargo a disposición da Cámara, que é o órgano que a nomeou, a proposta do PP, e ten o poder de revogala cunha maioría reforzada dos deputados.

Pero vinculou a súa renuncia a que os grupos parlamentarios se poñan de acordo previamente sobre o seu substituto á fronte da institución e na Vicevaledoría, que actualmente ocupa Pablo Cameselle (nome impulsado polo PSOE), para o que é necesaria unha maioría reforzada de 45 deputados (polo menos os escanos do PPdeG e doutro grupo parlamentario).

Así, este venres en declaracións aos medios, Milagros Otero defendeu esta forma de actuar, distinta maneira da forma na que en 2012 deixou o cargo o seu antecesor Benigno López, quen tamén se viu obrigado a dimitir despois dunhas polémicas declaracións nas que suxeriu a suspensión da Lei de dependencia.

Preguntada por que motivo elixiu condicionar a súa renuncia, incidiu en que o fixo por "responsabilidade" e rexeitou entrar en "polémicas": "Nada está escrito sobre dimisións". Non quixo entrar en se os grupos parlamentarios terán dificultades para pactar a renovación da defensoría galega e gardouse a súa opinión sobre o fallo xudicial condenatorio, aínda que lembrou que cada sentenza: "Non me meto nas decisións dos tribunais; comparto algunha e outras non".