Feijóo apela a "aprender" do 28A e "volver unir o voto" de C's e Vox no PP
Tras a debacle das Xerais, o líder do PP dia agora que o seu partido é "moderado", "galeguista" e "reformista".
Por E.P. | Vimianzo | 11/05/2019 | Actualizada ás 14:52
O presidente do PP de Galicia, Alberto Núñez Feijóo, apelou este sábado a "aprender" a "lección" das eleccións xerais do pasado 28 de abril e, seguidamente, propuxo "volver unir o voto de Cs e o voto de Vox, que foi inútil", no PP, un partido ao que cualificou como "moderado", "galeguista" e "reformista".
Así o expresou o tamén presidente da Xunta durante un mitin en Vimianzo (A Coruña) no que arroupou á candidata popular á Alcaldía, Raquel Rodríguez Amigo. Neste contexto, evidenciou que para que o actual rexedor, Manuel Antelo (de En Marea), continúe gobernando no municipio "pódese votar ás mareas, ao PSOE ou ao BNG".
Por iso, Feijóo fixo un chamamento a facer da súa formación "un amplo proxecto" de "amplo espectro político". "Cando estamos unidos somos máis útiles", suxeriu, xa que deste xeito poderase "seguir construíndo un país de moderación".
O principio da intervención do líder popular estivo marcado por un minuto de silencio pola morte do exvicepresidente do Goberno Alfredo Pérez Rubalcaba.
