Galicia achegou 65.000 euros en doazóns á campaña de Unidas Podemos para as xerais
É o xeito que tivo esta formación de recadar diñeiro para evitar endebedarse cos bancos como están outras formacións estatais e nacionalistas.
Por Europa Press / Redacción | A Coruña | 30/05/2019 | Actualizada ás 13:01
Podemos sinalou este mércores que o orzamento final que a coalición Unidas Podemos dispuxo para a campaña electoral das xerais foi de 5,5 millóns de euros. Isto supón un millón máis do que anunciou antes de que comezase a carreira cara ao 28A e o desfasamento débese a que sumaron as achegas de Esquerda Unida e Equo á confluencia. Tamén informaron sobre as achegas de microcréditos dos cidadáns que, no caso de Galicia, foron de 65.000 euros.
Fontes da formación 'morada' explican a Europa Press que é pronto para coñecer o gasto final da formación en campaña e lembraron que a Lei Orgánica do Réxime Electoral Xeral (LOREG) permite presentar a contabilidade ata 100 ou 125 días despois do día das eleccións.
O artigo 133 desa lei sinala que entre os 100 e 125 días posteriores ás eleccións, os partidos, federacións, coalicións ou agrupacións que alcanzasen os requisitos esixidos para recibir subvencións estatais ou que solicitasen adiantos con cargo ás mesmas, deben presentar ante o Tribunal de Contas unha contabilidade detallada e documentada dos seus respectivos ingresos e gastos electorais.
MICROCRÉDITOS PARA AS AUTONÓMICAS E MUNICIPAIS
Para as xerais, a formación 'morada' logrou reunir ata 1,76 millóns de euros grazas aos microcréditos. Pero a opción de seguir recibindo eses créditos a día de hoxe permanece operativa e aberta. Desde Podemos aclaran que esta ferramenta de financiamento seguirá accesible unha semana máis, do mesmo xeito que a posibilidade de facer ingresos para a campaña valenciana.
En paralelo, a formación abriu a mediados do mes de abril as vías para que simpatizantes e calquera persoa puidese apoiar con microcréditos tanto as campañas municipais como as diferentes autonómicas. Estes comicios celebraranse o 26 de maio.
GALICIA
Destacan as achegas á campaña de Aragón con 51.750 euros, Asturias con 16.950 euros, Madrid con 14.400 euros ou Castela e León con 13.000 euros. Na Comunidade Valenciana lograron reunir por esta vía de financiamento un total de 105.250 euros.
Mediante os microcréditos a formación 'morada' ofrece á cidadanía a posibilidade de facer un préstamo civil a Podemos con vistas a sufragar os gastos electorais. "Coa túa axuda queremos financiar esta campaña electoral. Podes achegar entre 50 e 10.000 euros que che devolveremos cando recibamos a subvención electoral correspondente aos resultados electorais", reza a mensaxe na web habilitada. O máximo que unha persoa pode achegar a unha campaña segundo a LOREG é de 10.000 euros.
A formación apostou desde o comezo da súa existencia por esta forma de financiar as súas campañas co obxectivo de non deber diñeiro ás entidades financeiras. De feito, no programa electoral de Unidas Podemos, incluían como proposta a prohibición de que os partidos financiasen as súas campañas con créditos bancarios. Esta proposta pode cristalizar no caso de que se dese un acordo de goberno con PSOE.
