A emigración galega vai cara outros lugares do Estado
O saldo de retornados do estranxeiro é positivo, mentres que a emigración cara outras comunidades é negativo.
Por Europa Press / Redacción | SANTIAGO DE COMPOSTELA | 27/06/2019 | Actualizada ás 13:46
Un total de 6.705 galegos --con nacionalidade española-- retornaron do estranxeiro á Comunidade en 2018, fronte aos 4.150 que se marcharon no mesmo período. Estes datos positivos contrastan coa senda negativa na marcha de persoas con nacionalidade española cara a outras comunidades, xa que se van de Galicia 74.190 fronte aos 73.834 que chegan, segundo os datos que publica este xoves o Instituto Nacional de Estatística (INE).
Pola súa banda, a Xunta destaca que é o quinto ano consecutivo con crecemento na chegada de retornados, un 8% máis, que é de case un 50% máis no últimos tres anos. Dos 6.705 que volveron en 2018, un 80% ten menos de 65 anos. Na última década son máis de 40.000 galegos os que regresaron do estranxeiro, destaca o Goberno galego.
Venezuela volve ser en 2018 o país do que proceden un maior número de galegos retornados (2.517), seguida de Suíza (723), Brasil (393), Estados Unidos (345) e Reino Unido (333). Estes datos compleméntanse cos publicados esta semana polo INE nos que se arroxaba un saldo migratorio total positivo en 2018 de 12.884.
