Turespaña abre a licitación para o Plan Director de Restauración do Hostal dos Reis Católicos
Os traballos de redacción do Plan consistirán en realizar un levantamento de planos e definir un documento técnico de investigación que mellorará o coñecemento do edificio e a análise dos usos actuais.
Por E.P. | SANTIAGO DE COMPOSTELA | 16/07/2019 | Actualizada ás 18:35
Turespaña abriu a licitación para a redacción dun Plan Director de Restauración do Hostal dos Reis Católicos de Santiago de Compostela, adscrito á Rede de Paradores, dependente do Ministerio de Industria.
Segundo informou a través dun comunicado o Plan "é indispensable para levar a cabo obras de calado no edificio", que está incluído no Plan Especial de Protección e Rehabilitación da Cidade Histórica de Santiago. O orzamento supera os 350.000 euros e contempla un prazo total de execución de quince meses.
Para a secretaria de Estado de Turismo e presidenta de Turespaña, Isabel Oliver, "é fundamental acometer actuacións nun dos paradores máis emblemáticos da cadea pública, non só para garantir a súa conservación senón tamén para ofrecer os máximos estándares de calidade".
Os traballos de redacción do Plan consistirán en realizar un levantamento de planos e definir un documento técnico de investigación que mellorará o coñecemento do edificio e a análise dos usos actuais, e marcará o proceso de conservación, rehabilitación e/ou reestruturación por fases, con distintos niveis e tipos de intervención. Ademais, prevese a redacción do proxecto e dirección de obra da Restauración da Capela Real e retablo do altar.
