Galicia sae á rúa contra a violencia de xénero: "Non podemos nin debemos tolerar nin unha morte máis"

Concellos e institucións de distintos puntos de Galicia saíron á rúa este luns para condenar o novo caso de violencia de xénero ocorrido na localidade lucense de Vilalba, e para oporse frontalmente a esta problemática: "Non podemos nin debemos tolerar nin unha morte máis".

Así o indicaba o manifesto lido tras unha das concentracións máis numerosas, a que ás 12,00 horas acolleu o propio Concello de Vilalba, do que era veciña tanto a vítima como o seu presunto agresor e que vive tres días de loito oficial.

Ante veciños, forzas de seguridade e persoal municipal, a alcaldesa da localidade leu un texto no que lembrou "rotos de dor" a Mari Carmen, a vítima, e cualificou a violencia de xénero como "un dos problemas sociais e estruturais máis graves da sociedade" actual.

"Non podemos nin debemos tolerar nin unha morte máis, non podemos permitir que nos agredan, insulten, humillen, acosen e asasinen, xa que ningunha muller merece ser maltratada e nada xustifica que un home empregue a violencia para dobregarnos e someternos co único fin de perpetuar o machismo", subliñou na lectura.

O municipio lembrou que se trata de "graves delitos que afectan a toda a sociedade" e indicou que, a pesar dos avances, "diariamente vulnéranse" dereitos das mulleres, polo que as medidas son "aínda insuficientes".

"Hoxe, desde Vilalba, asumimos un compromiso firme coa igualdade real e efectiva, para non volver lamentar nin unha morte máis: esiximos unha sociedade na que as mulleres teñamos algo que dicir e, sobre todo, nada polo que calar", engadiu.

OUTRAS CONCENTRACIÓNS

Un pouco antes, ás 10,00 horas, o presidente do Parlamento, Miguel Santalices, encabezou outra concentración en repulsa polo asasinato machista ocorrido en Vilalba, que se desenvolveu ás portas do Pazo do Hórreo.

Este minuto de silencio, no que participaron deputados e persoal da Cámara galega, así como do Valedor do Pobo, tamén contou coa presenza do conselleiro de Economía, Francisco Conde.

Tras o acto de repulsa, Miguel Santalices puxo de manifesto a "profunda dor" por sucesos como o ocorrido en Vilalba e instou á sociedade a manter unha "actitude vixiante" ante "calquera actitude que poida resultar sospeitosa". "Hoxe é un día triste, reflexionemos sobre que cousas podemos facer", dixo.

Tamén o edificio central da Xunta en San Caetano, en Santiago de Compostela, acolleu na mañá deste luns unha convocatoria de repulsa por este crime na que participaron traballadores das distintas consellerías e conselleiros como o de Sanidade, Jesús Vázquez Almuíña, a de Infraestruturas, Ethel Vázquez, o de Facenda, Valeriano Martínez, a de Mar, Rosa Quintana ou o de Economía, Francisco Conde.

A maiores, nesta concentración participou o vicepresidente da Xunta, Alfonso Rueda, e a secretaria xeral de Igualdade, Susana López Abella, que gardaron un minuto de silencio.

As concentracións por este novo asasinato machista repetíronse ao mediodía deste luns en numerosos concellos e entidades galegas, sobre todo naqueles situados na Mariña Lucense, afectada por este crime, e noutros puntos como Santiago de Compostela ou A Coruña, ademais de ante as delegacións da Xunta ou ante a Deputación de Lugo.

Ademais, para este martes, as redes feministas teñen convocadas en distintos puntos de Galicia concentracións contra este novo crime machista, o segundo do ano na Comunidade. As protestas alcanzarán O Porriño, Ourense, Lugo, A Coruña, Vigo, Santiago, A Estrada, Ferrol, As Pontes, Betanzos, Moaña, Val Miñor, Burela, Melide, Celanova, Monforte, O Barco e Carballo e comezarán entre as 19,45 e as 21,00 horas.

CRÍTICAS Á EXTREMA DEREITA

A portavoz nacional do BNG, Ana Pontón, criticou que os partidos da extrema dereita "estean a cuestionar a propia existencia" da violencia de xénero e avisou de que ese discurso "perpetúa" os comportamentos machistas.

Pontón lanzou esta mensaxe ao comezo dunha rolda de prensa celebrada este luns en Santiago de Compostela, na que trasladou todo a "solidariedade e apoio" á familia da muller asasinada en Vilalba.

Un novo crime contra as mulleres que, segundo a líder nacionalista, obriga a unha dobre reflexión. Así, en primeiro lugar, considerou necesario "abandonar todo conformismo" na loita contra este problema "analizando todo o que falta para corrixilo", ademais de reclamar máis medios e recursos para combater a violencia machista.

E, como segunda reflexión, censurou o feito de que existan forzas políticas como a extrema dereita que nega a existencia desta violencia contra as mulleres, que "alenta un discurso que no fondo o que fai é perpetuar este tipo de comportamentos machistas". "Non podemos permitir que este discurso se normalice, nin pactar coas forzas que o promoven", indicou.