Xenebra galega e enerxética
Unha pequena adega de Allariz innova no mercado dunhas das bebidas máis de moda.
Por Galicia Confidencial | Allariz | 09/04/2012 | Actualizada ás 09:54
A empresa ourensá Novalicor Auria presenta unha nova xenebra destilada con botánicos de propiedades estimulantes, o ginseng e o guaraná. A compañía baseada en Allariz xa innovara previamente no mercado dos destilados ao lanzar a marca Entropía, a primeira gama de licores elaborados con estas herbas exóticas.
Innovación
A nova Entropía Gin tamén está elaborada con "ingredientes 100% naturais". Ademais de botánicos clásicos das xenebras como o xenebreiro ou o coandro, a adega de Ourense innova ao incorporar ingredientes moi pouco habituais (hibisco, xenxibre e noz moscada) e outros nunca antes usados para unha xenebra, como son as herbas enerxéticas guaraná e ginseng.
Entropía Gin acadou a categoría de "excelente" ao conseguir 90 puntos na edición 2012 da coñecida Guía Peñín de los Destilados.
Así se logran as propiedades estimulantes
Finalizadas as destilacións, faise infusión coas 14 herbas para aportarlle a característica cor dourada e o intenso aroma desta xenebra. Lógrase así fusionar a elaboración tradicional das xenebras coa elaboración artesanal de licores propia Galicia, mediante maceración de botánicos.
Este proceso é fundamental para que as propiedades do ginseng e do guaraná pasen á xenebra con todas as súas características. Precisamente o que diferencia a Entropía Gin do resto, son estas dúas plantas, "utilizadas dende a Antigüidade como estimulantes, debido as súas coñecidas propiedades enerxéticas e mesmo afrodisíacas".
