A cidade de Ourense combaterá as bandadas de estorniños con aves rapaces

O Concello de Ourense incluirá aves rapaces para evitar o asentamento de bandadas de estorniños que poidan provocar problemas de saúde na poboación causados polos seus excrementos, segundo informou o Consistorio este luns. Segundo as estimacións da Concellaría de Medio Ambiente, a cifra destes paxaros pode ascender a 35.000.

O alcalde de Ourense, Gonzalo Pérez Jácome, considerou que "é un problema ao que se lle ten que dar solución nun espazo breve de tempo" ante as reiteradas queixas dos veciños.

As zonas máis afectadas son as inmediacións de Pardo de Cela, a Alameda e As Lagoas. Os técnicos de Medio Ambiente, segundo informou o goberno local, realizarán estudos sobre o terreo para "estudar as medidas máis eficaces".

As mesmas fontes engadiron, ademais, que as medidas consisten en introducir aguias 'harris' controladas por un experto en cetraría para que "perciban un perigo real" e así non se establezan nas zonas verdes urbanas.

Desta maneira, sinalaron que as medidas adoptadas os anos anteriores foron "ineficaces e ineficientes", como a "poda selectiva de árbores", as "colocacións de falcóns artificiais" ou "altofalantes que emitían o son de aves depredadoras".

O goberno local explicou que os excrementos provocan mal cheiro e que o seu carácter acedo causa a "abrasión de materiais onde se asintan", así como un "risco grave de escorregamentos" para os viandantes en días de choiva.