Feijóo volve reclamar ao Goberno o estatuto das electrointensivas e garantías de estabilidade
O presidente da compañía en España asegura está "a traballarse" polo futuro de San Cibrao, mentres os traballadores prevén mobilizacións.
Por E.P. | SANTIAGO DE COMPOSTELA | 02/09/2019 | Actualizada ás 18:20
O titular da Xunta, Alberto Núñez Feijóo, volveu a reclamar ao Goberno central que achegue garantías de estabilidade para compañías enerxéticas como Alcoa e aprobe o comprometido estatuto de empresas electrointensivas. Diso informou a Xunta nun comunicado tras a reunión mantida por Feijóo este luns en Santiago co presidente de Alcoa España, Álvaro Dorado.
"Seguimos traballando con eles para o futuro das plantas", explicou Dorado aos medios nunha breve declaración á súa saída do encontro co presidente do Goberno galego, a quen agradeceu esta convocatoria. "Seguimos traballando para o futuro de San Cibrao", limitouse a dicir a preguntas da prensa.
Neste sentido, Feijóo demanda ao Executivo central que busque solucións para manter a actividade e o emprego na planta de Alcoa en San Cibrao. Lembra que o gasto da compañía supón máis do 40 por cento dos custos totais da produción, moi superior a outras fábricas de Europa. Todo iso, nun contexto de recorte do 11 por cento da produción na factoría.
Por iso, o titular do Executivo autonómico sinala ao Goberno que na súa man está a aprobación da ampliación de 90 a 200 millóns de euros das compensacións dos gastos indirectos de dióxido de carbono prometida.
Ademais, o presidente da Xunta espera que a anunciada visita da ministra de Industria en funcións, Reyes Maroto, á planta de San Cibrao sirva para definir o contido do borrador do estatuto do consumidor electrointensivo que dea resposta tanto para Alcoa San Cibrao como para Parter na Coruña.
MOBILIZACIÓNS DOS TRABALLADORES
Pola súa banda, o presidente do comité de Alcoa San Cibrao, Xosé Paleo, explicou a Europa Press que este mércores está prevista unha reunión do pleno do comité de empresa, na que se abordarán os temas a levar a unha asemblea para a próxima semana para acordar mobilizacións ante a "pasividade" da Xunta e o Goberno pola súa situación.
Neste sentido, lembra que os problemas vividos polas plantas de Alcoa na Coruña e Avilés "empezaron igual que agora" en San Cibrao. Así, lamenta que se non hai unha solución isto poida afectar o emprego.
Na Coruña "seguen coa electrólise parada" tras a súa venda a Parter. "E nós non queremos chegar aí", apunta sobre 1.000 empregos directos e outros 1.000 indirectos na fábrica da Mariña lucense. Así mesmo, está prevista unha reunión na tarde deste xoves, 5 de setembro, de representantes dos traballadores de Alcoa San Cibrao co presidente da Xunta.
