A Xunta quere ter a comezos do vindeiro ano o plan para o comercio 2025-2030

O plan da Xunta para o comercio para o período 2025-2030 estará listo no primeiro trimestre do ano que vén, segundo a previsión que manexa a consellería. Este luns, o conselleiro de Emprego, Comercio e Emigración, José González, reuniuse con representantes dos recintos feirais de Galicia, aos que cualificou de "auténticos referentes de dinamización das súas respectivas contornas".

Acompañado polo director xeral de Comercio e Consumo, Gabriel Alén, o encontro enmárcase no proceso de escoita aberto para a elaboración do plan estratéxico do comercio 2025-2030. Esta folla de ruta está previsto que estea lista no primeiro trimestre de 2025 e o conselleiro resaltou que busca "seguir vertebrando" as vilas e cidades a través da xeración de riqueza e emprego.

No plan, segundo a consellería, destacarán iniciativas como os novos proxectos de dinamización 'Vilas vivas', cuxo primeiro piloto efémero terá lugar en decembro en Ribadavia e que logo se irá estendendo a outras cabeceiras de comarca.

Tamén os bonos 'Activa Comercio', que se reeditarán en 2025 e a aposta pola consolidación dunha rede galega de Mercados Excelentes, por avanzar na transformación dixital e modernización do sector comercial e artesanal e polo desenvolvemento de plans formativos.

Reuníon do conselleiro José González con representantes dos recintos feirais. XUNTA | Fonte: Europa Press