AGE, En Marea, Galicia en Común e agora... Grupo Común da Esquerda

Os dez deputados que até agora formaban o grupo parlamentario de En Marea -despois do paso doutro catro parlamentarios ao Grupo Mixto- presentaron este martes a súa nova marca, 'Grupo En Común da Esquerda' que, aseguran "é un cambio de nome pero non é un cambio de proxecto".

Nunha rolda de prensa na que participaron nove dos deputados do grupo -coa ausencia dunha das viceportavoces, Carmen Santos- os parlamentarios presentáronse como os "lexítimos herdeiros" de AGE e as mareas locais, marcando así as distancias co partido de Luís Villares que mantén a marca de En Marea.

"Vímonos na obrigación de cambiar ao nome -do grupo parlamentario de En Marea- ante a existencia dun partido que tiña un nome igual que o noso grupo parlamentario", dixo o portavoz, Manuel Lago, en referencia á formación que lidera Luís Villares e da que forman parte os catro deputados do grupo mixto, Paula Verao, Pancho Casal e Davide Rodríguez, co propio Villares á cabeza.

Deste xeito, Lago insistiu en que o grupo conformado por persoas pertencentes a Podemos, Esquerda Unida e Anova pese ao cambio de nomenclatura "non é un proxecto novo, vén de lonxe e vai para lonxe".

Os deputados Antón Sánchez e Manuel Lago nas protestas de Vodafone | Fonte: En Marea

DIVISIÓNS

Por tanto, sosteñen que o Grupo Común da Esquerda é o "lexítimo herdeiro" da experiencia política que "naceu como acordo en AGE" na pasada lexislatura, "continuou co enorme éxito das mareas ciudadanistas" en maio de 2015 "e conseguiu o seu enorme éxito con En Marea como principal partido da oposición" tras as eleccións autonómicas a pesar de que perdeu ese status por mor da separación do grupo o pasado mes de xuño.

Ademais e a pesar de que negan que esta vaia a ser a marca electoral que se empregue nas próximas eleccións galegas do 2020, os parlamentarios si cren que o traballo que desempeñen na Cámara galega será un aval importante para a configuración dunha nova candidatura de unidade popular.

"Vai haber unha candidatura de unidade popular rupturista para derrotar a Feijóo e este grupo vai ser unha peza importante na construción desa alternativa", proclamou Lago, que en todo caso apelou ao papel que para iso xoguen tamén os "partidos, as mareas e as persoas independentes" a través dun "ambiente de unidade, consenso e optimismo" que non marcou a última etapa de En Marea.

Ademais do cambio de nome, En Común tamén presenta un cambio organizativo en tanto que desaparece a figura de portavoz único que marcou os tres primeiros anos de En Marea con Luís Villares á fronte e que causou continuas discrepancias internas.

"PROXECTO PLURAL"

"Xa que somos un proxecto político plural tomamos onte a decisión de que a representación pública deste grupo tamén ten que ser plural e coral", esgrimiu Lago que pasa a ser o portavoz do grupo no plano máis institucional.

Como a "figura de portavoz único non nos gustaba" agora as tarefas dividiranse entre varios deputados de forma que o portavoz nacional de Anova, Antón Sánchez, será o encargado de ser "o azoute de Feijóo" posto que será a persoa encargada de realizar a función de control ao presidente galego e será o que o interpele nas sesións plenarias.

Mentres tanto, a membro da dirección de Podemos Galicia, Luca Chao, pasará a ser a responsable de comunicación do grupo e será a persoa encargada de dar conta dos acordos da xunta de portavoces e de realizar as roldas de prensa que de forma habitual o grupo realiza cada luns.

Neste sentido, Luca Chao defendeu o proxecto do Grupo Común da Esquerda abre unha "nova etapa" e enfronta "un ano decisivo" no que todos os deputados buscan "servir máis aínda de altofalantes da Galicia que dista moito da imaxe de triunfo que pretende vender o PP".

Con ese obxectivo, segundo Chao, desde o Grupo Común trasladarán á Cámara os problemas derivados da precariedade laboral, do desmantelamento dos servizos públicos, as ameazas do medioambiente e serán o reflexo das demandas dos colectivos feministas, entre outros.