Sumar Galicia completa este sábado o seu proceso constituínte, liderada por Paulo Carlos López e Verónica Martínez Barbero

Sumar Galicia celebra este sábado a asemblea xeral que completa o seu proceso constituínte, que proclamará a Paulo Carlos López como secretario xeral e a Verónica Martínez Barbero como presidenta (única candidatura presentada), e que contará coa presenza da vicepresidenta segunda do Goberno e ministra de Traballo, Yolanda Díaz.

Será na Facultade de Psicoloxía da Universidade de Santiago de Compostela, no Campus Sur, e en acto de peche, ás 18.00 horas, intervirán a presidenta e o secretario xeral electos, a secretaria de Organización de Movemento Sumar, Lara Hache, e o deputado no Congreso Manuel Lago. Así, está previsto que se dea luz verde á única candidatura presentada para conformar a nova Coordinadora Nacional da formación, cunha lista encabezada por Paulo Carlos López e Verónica Martínez Barbero (portavoz de Sumar no Congreso tras a saída de Íñigo Errejón).

En concreto, a candidatura, integrada por 30 persoas titulares e oito suplentes, será a única que se someta á asemblea xeral deste sábado. Na lista que configurará a estrutura directiva de Sumar Galicia están, entre outros, o deputado Manuel Lago; o exconcelleiro da Coruña, Juan Díaz Villoslada; o exsecretario xeral de CC.OO. Galicia, Ramón Sarmiento; a que fora secretaria de Organización de Podemos Galicia, Gloria Alonso; ou a exportavoz no Congreso e logo aspirante á presidencia da Xunta, Marta Lois, que pecha a candidatura. Este proceso congresual é o primeiro co que Sumar busca afianzarse no plano territorial e ao que seguirá proximamente outra asemblea autonómica en Euskadi, mentres que a súa convención estatal quedou aprazada para marzo do ano que vén.

OBXECTIVO: 2028

Nunha entrevista concedida a Europa Press tras coñecerse que aspiraba a liderar a formación en Galicia, Paulo Carlos López, que foi número 2 na candidatura de Sumar Galicia pola provincia da Coruña nas pasadas eleccións autonómicas nas que a formación non obtivo representación, aseguraba que o obxectivo político "fundamental" é chegar ao ano 2028 cun proxecto "sólido" que permita "un cambio político en Galicia". "O que nos motiva realmente é trasladar a Galicia o que tamén fai Sumar a nivel de Estado", afirmaba López que, tras un ciclo electoral "moi acelerado" que "impediu consolidar a organización" e abordáronse os procesos electorais "dunha forma interina", agora queren falar dun movemento "para a próxima década", xa que cre que "agora si" hai tempo para "facer as cousas ben".

A líder de Sumar e vicepresidenta segunda do Goberno de España, Yolanda Díaz (2d), participa xunto á candidata á Xunta de Galicia, Marta Lois (d), Juan Villoslada (i), Paulo C. López (c) e Berta Vigil (2i) | Fonte: M. DYLAN - Arquivo