O delegado do Goberno pide á Xunta "arrimar o ombreiro" polas Pontes

O delegado do Goberno en Galicia, Javier Losada, apoiou a actuación do Executivo central en buscar "solucións" para a industria galega, nomeadamente para a planta de Endesa nas Pontes de García Rodríguez, e pediu á Xunta que "arrime o ombreiro".

Durante unha entrevista concedida este domingo á Cadea Ser, recollida por Europa Press, Losada dixo estar "preocupado" por este sector en Galicia, cuxa produción rexistrou en agosto unha caída do 6 por cento, e lembrou ao presidente galego, Alberto Núñez Feijóo, que o artigo 30 do Estatuto de Autonomía dá á Xunta "competencias exclusivas" en industria.

Sobre a planta das Pontes, o delegado subliñou que o Goberno central reuniuse co comité de empresa "varias veces". "Niso estamos, traballando escoitando aos alcaldes, aos traballadores e aos transportistas. A Xunta tamén ten que arrimar o ombreiro, non só dicir 'quero' ou 'pido'", criticou.

No entanto, Losada tamén se dirixiu á empresa, Endesa, para reclamarlle que presente un "proxecto de viabilidade" que pase pola súa reconversión e que "non se desentienda" do proceso de transición enerxética na comarca.

Acerca da factoría de Alcoa en San Cibrao, Cervo (Lugo), o delegado do Goberno asegurou que o estatuto de empresas electrointensivas "foi un compromiso que se adquiriu" xa en xaneiro, cando o Executivo "fixo o proceso de información pública", pero finalmente quedou paralizado por estar en funcións.

"Por certo, agora que está a pedir intensamente Feijóo e a Xunta que o Goberno tome medidas polas electrointensivas, un podería preguntarse: e que pasou no últimos oito anos, nos últimos 10 anos? Pois que Aznar e Rajoy tomábanse a pitorreo o do cambio climático", evidenciou Javier Losada.

O delegado do Goberno en Galicia, Javier Losada, nunha entrevista para a Cadena Ser / CADEA SER / Europa Press