Galicia contará cun centro especializado en ciberseguridade

O próximo ano porase en marcha o centro GaiásTech, unha iniciativa que busca dar servizo ao ecosistema dixital galego e que actuará de coordinador da rede de nodos de especialización tecnolóxica. Neste contexto, a directora de Amtega, Mar Pereira, avanzou a creación dun nodo especializado en ciberseguridade, unha materia "esencial" nun momento de transformación dixital.

Así o trasladou durante a súa intervención na última xornada do 'Foro Cybersec@gal', organizado e impulsado pola cátedra R en Ciberseguridade e o Colexio profesional de Enxeñaría Informática.

Pereira destacou o traballo desenvolvido desde a Xunta tanto a nivel interno como para cidadáns e empresas como administración que custodia unha gran cantidade de información sensible, e lembrou a recente ampliación do Plan de Seguridade Tecnolóxica, con máis de 10 millóns de orzamento ata 2021.

Tamén sinalou outras iniciativas como Reacciona TIC, que ofrece asesoramento a empresas para a súa dixitalización e mellora da seguridade, entre outras cuestións.

A xornada deste xoves, que se celebrou no auditorio Neira Vilas da Cidade da Cultura, contou coa participación de expertos nacionais e internacionais en materia de ciberseguridade, ademais dunha mesa de debate con portavoces de empresas e entidades como Balidea, Gradiant, Inditex, Abanca ou Grupo Euskaltel.

Durante todo o foro, realizáronse talleres, relatorios e analizáronse solucións, normativos, desafíos e ameazas relacionadas coa seguridade na contorna dixital.

Cidade da Cultura de Santiago de Compostela