Os concellos galegos elixirán novo presidente a finais de novembro

A X Asemblea da Federación Galega de Municipios e Provincias (Fegamp) escollerá ao novo presidente e xunta directiva da entidade o próximo 29 de novembro, día no que dará comezo unha nova etapa de mandato na Federación que abaracará de 2019 a 2023.

Así o anunciou este mércores o presidente da Fegamp e alcalde do Barco de Valdeorras (Ourense), Alfredo García, que o próximo novembro pechará os cinco anos a cargo da organización durante os que tratou de "pór en valor o poder local".

O edil do municipio ourensán explicou que na X Asemblea presentarase unha memoria destes cinco anos, cunha valoración dos "avances" que se conseguiron e do que queda por facer. En todo caso, destacou "o valor" dos gobernos locais e a súa "valentía" para enfrontar "os problemas" que xurdiron a raíz "da crise económica" e que seguen afectando.

Respecto dese período, García lembrou que desde aquela a política local fíxose cargo de moitos asuntos "fosen ou non competencia municipal", á vez que non esquece que "as localidades son a primeira porta" á que chama a veciñanza para "resolver os seus problemas".

Ademais, subliñou "as colaboracións que existiron durante este cinco anos" entre as localidades e tamén con outras administracións, unha "caracterísitica fundamental" do municipalismo "desde sempre".

Presidente da Fegamp, Alfredo García, xunto co vicepresidente primeiro, Alfonso Villares, e o vicepresidente segundo, Evencio Ferrero | Fonte: Europa Press