O comercio de mercadorías en Galicia deixa un balance positivo de 273 millóns de euros

Galicia exportou mercadorías por un valor de 2.017,2 millóns de euros en setembro deste ano, un 9,1% máis que as comercializadas no mesmo período de 2018. Con todo, tamén ascende o número de produtos importados ata 1.743,6 millóns de euros, o que deixa un balance de ganancias de 273,6 millóns de euros, un 13,7% menos que o alcanzado no exercicio anterior.

Desta maneira, o saldo comercial de Galicia en relación ás transaccións co estranxeiro durante setembro mostra valores positivos que rompen a tendencia negativa que se mantivo desde xullo deste ano.

Pola súa banda, Pontevedra foi a provincia que máis incrementou o número de exportacións, cun crecemento interanual do 33% que corresponde en gran medida á evolución da comercialización de bens de equipo co exterior. Este tipo de produtos viron incrementado o número de exportacións ata nun 80,1%, a maior subida de todos os sectores.

Os datos positivos desta provincia compensan o descenso notable das exportacións que rexistrou Lugo e A Coruña, segundo a Secretaría de Estado de Comercio, cunha contracción do 7,1% e 4,3% respectivamente.

En canto ás importacións, o incremento galego débese en gran medida ás compras de bens que fixeron A Coruña e Pontevedra, con taxas de crecemento do 13,4% e 16,5% en cada caso.

SECTORES DE MAIOR PESO

Os sectores que máis peso tiveron dentro da exportación galega foi o subsector téxtil-confección (un 27% do total); os bens de equipo (un 16,9% con especial incidencia en material de transporte por estrada); o sector do automóbil (14,3%), a alimentación, os produtos enerxéticos e a facturación de químicos e metais.

Todos estes bens teñen como principal destino os países da Unión Europea, o 74,9% das exportacións de Galicia van parar a Estados como Francia (o 17,3%), Portugal (12,7%), Italia (8,5%), Reino Unido (6,6%), Alemaña (5,8%), Países Baixos (5%), Polonia (4%), Bélxica (3,9%), Grecia (1,7%) e Romanía, Malta e Suecia en menor medida.

Fóra da UE destacan Marrocos (3,1%), Estados Unidos (2,5%), Groenlandia (2,5%), Turquía (2,1%) e China, México, Chile, Singapura e Argetina con menos do dous por cento.

Estas cifras evidencian un crecemento nas exportacións á Unión Europea a un ritmo "máis moderado" (do 1,8%) que as destinadas ao resto do mundo (4,4%). Con respecto a outros continentes, Asia presentou un fortísimo crecemento en termos relativos de ata o 60,9%; América do 61,9%; e África do 13%.

Exportacións