O Concello de Coruña activa o dispositivo para persoas sen fogar ante o mal tempo

A Concellaría de Benestar Social do Concello da Coruña activará o sábado pola noite o dispositivo para persoas sen fogar debido ao aviso de alerta vermella polas condicións meteorolóxicas previstas.

Segundo informa, a partir das 21,00 horas do sábado e ata as 09.00 horas do domingo porase en marcha este protocolo para dar acubillo ás persoas sen fogar. En concreto, consiste na apertura do centro cívico dos Mallos durante a noite para que poidan cear e refuxiarse.

O Servizo Municipal de Atención a Urxencias (SEMUS) e a Policía Local colaborarán tamén para facer as rutas co obxectivo de localizar as persoas que dormen na rúa para informarlles da existencia deste servizo.

Como consecuencia destas condicións meteorolóxicas, durante a xornada do sábado permanecerán pechados a Torre de Hércules, os campos municipais de fútbol e golf, ademais de suspenderse actividades previstas nestas instalacións. Tamén os concellos de Sada e Arteixo decidiron suspender actividades programadas para a xornada do sábado pola tarde.