Foro Galego de Inmigración acusa ao Goberno central de "abandonar" ás persoas migrantes traídas a Galicia

O Foro Galego de Inmigración denunciou este luns a "situación de indefensión e abandono" das persoas solicitantes de asilo, "condenadas á irregularidade administrativa durante dous anos".

Así, a organización sinalou que, nos últimos días, coñeceuse que as persoas que se atopaban nos dispositivos especiais de acollida en Galicia "vense na obrigación de abandonalos" ao denegarse o seu procedemento de asilo. "Son persoas que quedan abandonadas á súa sorte, despois de ser trasladadas a Galicia polo Goberno", apuntaron, e advertiron de que "son só unha pequena parte do conxunto de persoas migrantes residentes en Galicia que se atopan nunha situación dramática neste momento".

Respecto diso, o Foro sinalou que moitas outras persoas migrantes víronse forzadas a solicitar asilo como única vía para poder regularizar a súa situación, coa entrada en vigor do novo Regulamento de Estranxeiría, e que "quedarán ebn situación de irregularidade administrativa", tendo mesmo que abandonar os seus postos de traballos.

Segundo os seus cálculos unhas 12.000 persoas en Galicia non se poden acoller ao período transitorio que establece o novo Regulamento, ao recibir a denegación de asilo despois do mes de marzo. "Para estas persoas, agora, a condena será a 2 anos de situación de irregularidade administrativa antes de poder acceder aos arraigamentos, dous anos sen dereitos, tendo que sobrevivir na economía mergullada e na explotación laboral", denunciaron.

Por iso, o Foro esixiu unha "resposta política" por parte do Goberno central para resolver "de forma razoable" a situación destas persoas. Así mesmo, pediu que se implemente unha alternativa "antes do 20 de maio" e advertiu de que non se debe permitir "esta terrible inxustiza" con persoas que "xa son veciños e veciñas das aldeas, pobos, vilas e cidades de Galicia".

Varios inmigrantes desprazados desde Canarias nun albergue do Porriño | Fonte: Javier Vázquez - Europa Press