Dous terremotos en Ourense e outro en Pontevedra nunha semana
O último foi a primeira hora deste xoves en Boborás. Os outros en San Amaro e en Vilaboa.
Por Europa Press / Redacción | OURENSE | 26/12/2019 | Actualizada ás 10:05
A localidade ourensá de Boborás rexistrou á primeira hora deste xoves un tremor de terra de magnitude 2 na escala Richter, segundo os datos de información sísmica do Instituto Xeográfico Nacional.
En concreto, o tremor tivo lugar pouco antes das 7.30 horas da mañá deste xoves. O epicentro situouse a uns 22 quilómetros de profundidade, no municipio de Boborás.
Os rexistros oficiais indican que hai só uns días, o pasado 21 de decembro, esta mesma área rexistrou outro movemento sísmico. Foi, concretamente, o municipio veciño de San Amaro, onde se produciu un tremor de terra de magnitude 3,1.
Ademais, hai xusto unha semana, o pasado 19 de decembro, outro tremor de magnitude 2,1 afectaba o municipio pontevedrés de Vilaboa.
