Trasladados os catro ocupantes dunha vivenda debido a un incendio en Rianxo

Catro persoas, dous nenos e dúas mulleres, foron evacuadas na madrugada deste xoves polos servizos sanitarios de urxencia tras producirse un incendio na súa vivenda, situada no lugar da Senra, no concello coruñés de Rianxo.

Segundo informou o 112 Galicia, ás 3,30 horas deste xoves, o Centro Integrado de Atención ás Emerxencias (CIAE) recibiu a chamada dunha das persoas residentes na vivenda para alertar da presenza de fume en toda a vivenda, posiblemente, procedente dunha estufa de pellet.

Deste xeito, o persoal do 112 Galicia avisou a Urxencias Sanitarias de Galicia-061, aos Bombeiros de Boiro, aos axentes da Garda Civil e voluntarios de Protección Civil da localidade. En concreto, o 061 enviou unha ambulancia de soporte vital básico que levou ao centro de Atención Primaria de Rianxo a dous menores e ás mulleres M.D.R.C., de 62 anos, e A.M.R., de 38, confirmaron a Europa Press fontes sanitarias.

Os membros do Servizo de Protección, Extinción de Incendios e Salvamento indicaron ao 112 Galicia, unha vez finalizadas os labores de extinción e de ventilación da vivenda, que o lume afectou a unha papeleira e ao moble onde estaba gardada.

INCENDIO NUNHA NAVE DE VILAMARÍN

Os servizos de emerxencia tamén extinguiron na madrugada deste xoves un incendio que afectou a unha nave industrial situada no Polígono de Tamallancos, no concello ourensán de Vilamarín. Segundo informou o 112 Galicia, membros dos equipos de extinción sinalaron que ardeu serrín e algunhas chapas do tellado resultaron afectadas as chamas, pero sen causar ningún dano persoal.

Todo comezou sobre as 21,00 horas deste mércores cando varios particulares contactaron co Centro Integrado de Atención ás Emerxencias para informar que se vía saír lume polo tellado dunha fábrica de serrín próxima á N-525. Tras ser alertados polos xestores do 112 Galicia, ata o punto desprazáronse varias dotacións de extinción. O operativo contou coa intervención dos Bombeiros do Carballiño, ademais do GES de Ribadavia, Protección Civil do Carballiño e de Vilamarín e Distrito forestal da zona.

Unha vez no punto, e tras valorar a situación, tamén foi requirida a intervención do Grupo de Apoio Loxístico da Axencia Galega de Emerxencias (Axega). Así, un camión gran nodriza do GALI apoiou, na subministración de auga, aos servizos de emerxencias alí desprazados. Axentes da Garda Civil e da Policía Nacional tamén estiveron na zona para colaborar na coordinación do operativo.

Ás 2,30 horas deste xoves os efectivos do Servizo de Extinción Prevención de Incendios e Salvamento confirmaron que o lume quedaba controlado e que os equipos de intervención seguían no punto para refrixerar a zona. Os traballos de extinción finalizaron sobre as 5,00 horas.