Crespo pide ao Supremo que investigue ao xuíz De Diego por durmirse no xuízo da Gürtel
Non foi sancionado pero o Consello constatou "determinados modos" do maxistrado constitutivos de "demérito profesional".
Por Europa Press / Redacción | MADRID | 15/01/2020 | Actualizada ás 19:40
A defensa do que fose número dous de 'Gürtel' e exsecretario de organización do PP en Galicia Pablo Crespo, condenado a 37 anos e medio de cárcere pola primeira etapa de actividade desta trama corrupta, pediu ao Tribunal Supremo -pendente de revisar este asunto en casación-, que teña en conta a investigación que o Consello Xeral do Poder Xudicial (CGPJ) realizou no seu día a un membro do tribunal que xulgou o caso, Julio de Diego, por durmirse durante o xuízo.
Pide concretamente que requira ao CGPJ o informe que no seu día realizou Ángel Hurtado, presidente do tribunal que xulgou o caso na Audiencia Nacional, onde se aludía a "movementos coa cabeza" do seu compañeiro, ao que se engadía que lle tivo que chamar a atención por utilizar o teléfono móbil.
O pasado 21 de decembro, o promotor da Acción Disciplinaria do Consello Xeral do Poder Xudicial (CGPJ), Ricardo Conde, acordou o arquivo desta denuncia, que fora realizada por outro dos procesados na causa, o exalcalde de Majadahonda (Madrid) Guillermo Ortega , aínda que advertiu de determinados modos" do maxistrado constitutivos de "demérito profesional".
A defensa de Crespo, que exerce Durán&Durán Avogados, considera que estas circunstancias deben ser tidas en conta polo Tribunal Supremo á hora de resolver os recursos de casación presentados contra a sentenza ditada no seu día pola Audiencia Nacional.
"Observamos un comportamento, actitude e postura do ilustrísmo señor De Diego que, ademais de ser de todo punto inaceptable e incompatible cos estándares que imprimiu a propia Sala Segunda deste Tribunal Supremo -en clara alusión ao xuízo televisado do 'procés'- (...) proxecta un inequívoco desprezo por algúns dos principios máis esenciais do proceso penal", ao renunciar co seu comportamento a "seguir nun estado de rigorosidade e seriedade un litixio de especial dificultade", denuncia a defensa de Crespo.
INFORME DE HURTADO
No seu informe ao CGPJ, o presidente do tribunal da 'Gürtel' afirma que chamou a atención en varias ocasións a De Diego "por non manter a compostura esixible", pola súa 'escasa atención', xa que lle viu "manexar o móbil" durante as sesións.
No entanto, sobre o feito de que o maxistrado puidese quedarse durmido nalgunha xornada, Hurtado indicou que non podía facer tal "categórica" afirmación debido ao ángulo da cámara co que foi captado. A defensa de Crespo inclúe no seu escrito estas imaxes.
