O Sergas insiste en que traballa para cubrir as prazas e reabrir o paridoiro de Verín

O Servizo Galego de Saúde (Sergas) asegura que traballa para cubrir as prazas de pediatras vacantes que permitan reabrir o paritdoiro do Hospital de Verín "dentro dunha situación de dificultade de falta de profesionais" desta especialidade.

Así o manifestou o xerente do Sergas, Antonio Fernández-Campa, tras ser preguntado este venres na rolda de prensa de balance das listas de espera, por como se traballa para paliar a falta de pediatras e cubrir as prazas vacantes desta especialidade co fin de reabrir o paridoiro de Verín e a situación de centros de saúde como o da Baña.

"O problema de falta de especialistas é de Galicia e de todo o Sistema Nacional de Saúde e de Europa", explicou o xerente do Sergas, quen concretou que no caso da Baña "mantense o sistema" coa mesma cantidade de profesionais, á vez que apuntou que hai centros próximos como o de Negreira.

Mentres, no caso concreto de Verín sinalou que a xerente da zona traballa para a reapertura do paridoiro. "Para nós o máis importante é a seguridade das nais e nenos", insistiu. Preguntado sobre se buscan pediatras fóra de Galicia para reabrir ese servizo en Verín, o xerente do Sergas puntualizou que entrevistan "persoas que se poidan interesar nesas coberturas", á vez que lembrou que "a demanda de profesionais non só é en Galicia".

As matronas protestan contra do peche do paritorio de Verín.