Balance dun ano de eleccións municipais: dez concellos xa cambiaron de alcalde
Sandra Quintas, que xa exerce en funcións, converterase esta semana en alcaldesa de Bande tras o adiamento do pleno pola pandemia. Este mesmo xoves non prosperou a moción de censura en Catoira.
Por Europa Press / Redacción | SANTIAGO DE COMPOSTELA | 24/05/2020 | Actualizada ás 11:02
Case unha decena de concellos galegos cambiaron de alcalde no primeiro ano de mandato, período no que se rexistraron mocións de censura nos municipios coruñeses de Fene e Mugardos.
Ademais, neste primeiro ano desde as eleccións municipais celebradas o 26 de maio de 2019, distintas razóns provocaron cambios nas alcaldías de Bande, Cenlle e San Amaro, Baralla e Mondoñedo e Cerceda .
Varios estiveron motivados pola marcha dos que eran rexedores para concorrer nas listas ás eleccións autonómicas do 5 de abril --finalmente suspendidas polo COVID-19--. Este é o caso de Bande, Cenlle e Mondoñedo.
En Bande, o que era rexedor, José Antonio Armada, deixou esta responsabilidade para concorrer na candidatura do PP por Ourense ás autonómicas. Con todo, a pandemia sanitaria obrigou a pospor a celebración do pleno para a elección de Sandra Quintas, que exerce de alcaldesa en funcións, como nova rexedora. Ela mesma detallou a Europa Press que se prevé que a sesión plenaria se celebre esta próxima semana.
Pola súa banda, en Cenlle, José Manuel Rodríguez Lamas foi elixido a principios do pasado mes de marzo como novo rexedor tras a dimisión de Gabriel Alén, quen tamén deixou a Alcaldía para concorrer na candidatura do Partido Popular ás autonómicas por Ourense.
A mesma situación produciuse en Mondoñedo, onde a que era rexedora, Elena Candia, renunciou ao cargo para encabezar a candidatura dos populares pola provincia. A marcha de Candia, que tamén lidera o PP provincial, motivou que o popular Manuel Otero, que concorrera como o seu número dous, e se fixese co bastón de mando.
En Baralla, o que fora alcalde durante máis de 30 anos, Manuel González Capón (PP), faleceu 17 días despois de tomar posesión afectado dunha grave enfermidade. Tras iso e coa renuncia do número dous da lista, tomaría posesión o seu fillo, Miguel González Piñeiro, como primeiro edil.
DIMISIÓNS
Pola súa banda, en San Amaro, a socialista María del Carmen Pérez Curral presentou a súa dimisión por razóns persoais, o que deu lugar a que o tamén socialista Rubén Gómez fora investido alcalde.
Con todo, este non será o único cambio que afronte esta localidade ourensá tendo en conta que tras as pasadas eleccións, os socialistas (que obtiveron tres edís) e Xuntos por San Amaro (dous concelleiros) alcanzaron un pacto de goberno polo que desbancaron da alcaldía ao PP (con catro edís). Este acordo inclúe a decisión de que os socialistas se turnen na Alcaldía co independente Carlos Paz, que será rexedor durante os dous últimos de mandato.
Ademais, na provincia da Coruña, no pasado mes de xaneiro o ata entón alcalde, o exmilitante socialista José García Liñares, presentou a súa renuncia tras confirmarse a súa inhabilitación durante oito anos por un delito de prevaricación administrativa. No seu lugar, o pasado 12 de febreiro fíxose co bastón de mando o socialista Juan Manuel Rodríguez García, que exercer de alcalde deste municipio coruñés de 5.001 habitantes.
MOCIÓNS DE CENSURA EN FENE E MUGARDOS
Nos últimos 12 meses tamén se rexistraron dúas mocións de censura. En Fene, o nacionalista Juventino Trino accedeu á Alcaldía tras unha moción de censura apoiada por Esquerda Unida e do Grupo Socialista contra Gumersindo Galego, quen anteriormente fora reprobado tras ser sorprendido conducindo baixo os efectos do alcol.
Pola súa banda, en Mugardos, o popular Juan Domingo de Dios foi elixido novo rexedor ao prosperar a moción de censura presentada polos cinco edís do PP e o tres do PSOE. A iniciativa saíu adiante despois dun pleno extraordinario no que a que era rexedora Pilar Díaz (Esquerda Unida) deu conta da súa renuncia á Alcaldía para tratar de frear o cambio, un paso atrás que non evitou o apoio dos socialistas ao candidato do PP. Unha postura que foi desautorizada pola dirección galega do PSdeG.
DIMISIÓN EN CATOIRA
En Catoira este xoves a dimisión do que era alcalde, o nacionalista Xoán Castiñeiro, tan só cinco minutos antes do inicio do pleno, evitou 'in extremis' o debate da moción de censura presentada polos grupos de PP e PSOE para arrebatarlle o bastón de mando e turnarse a Alcaldía.
A renuncia do alcalde, ademais, coincidiu co rexeitamento de dous edís do grupo municipal socialista, Daniel Touriño e Roberto Bouzada, a apoiar a moción de censura que o seu grupo (5 concelleiros) presentara, xunto co grupo do PP (3 edís), o pasado 3 de marzo.
Ante iso, a edil do Bloque María Paz, que exercía de tenente de alcalde, asumiu de forma provisional a alcaldía ata que a corporación convoque a segunda sesión de investidura deste intenso mandato.
