Alu Ibérica anuncia a compra de dous fornos para a planta da Coruña

A nova dirección de Alu Ibérica anunciou este mércores a compra de catro fornos de crisol basculante a gas para a fusión e mostraxe de chatarra. O primeiro sairá da factoría de Hormesa con destino a Avilés este mesmo mércores, mentres que o segundo está previsto que chegue á planta asturiana en catro semanas.

Os dous restantes instalaranse na planta da Coruña unha vez que se complete a instalación de gas na factoría galega, segundo informou Grupo Riesgo a través dunha nota de prensa.

As plantas de Avilés (Asturias) e A Coruña pertencían a Alcoa, quen anunciou en outubro de 2018 que deixaba de producir nesas instalacións. Finalmente, produciuse a venda das mesmas ao fondo suízo Parter Capital, que se materializou o verán de 2019. As plantas pasaron a pertencer a un grupo denominado Alu Ibérica. En abril deste ano 2020 coñecíase que Grupo Riesgo adquirira as instalacións

Segundo a nova dirección, os fornos anunciados permitirán, entre outras cousas, obter unha mostra superior da pureza da chatarra que chega ás factorías, o que reverte nunha optimización do produto final.

PECHE DO COMITÉ DE EMPRESA

Todo iso, no mesmo día en que o comité de empresa de Alu Ibérica na Coruña iniciou un peche en dependencias do Concello para esixir, entre outras cuestións, que se "cumpran" os acordos en materia de investimentos de cara a garantir un proxecto industrial para a planta. Aseguran tamén que manterán esta protesta ata que se lles comunique a convocatoria da mesa industrial por parte do Ministerio de Industria.