Pecha a fábrica de North Sails en Cuntis, fundada por Pedro Campos, presidente do Real Club Náutico de Sanxenxo

A fábrica de North Sails, situada no polígono da Ran no municipio pontevedrés de Cuntis e que en novembro de 2024 resultou adxudicataria da subministración de velas para o buque escola Juan Sebastián de Elcano, anunciou o seu peche. A factoría, primeiramente chamada 'Velas Campos', foi fundada polo presidente do Real Club Náutico de Sanxenxo e anfitrión do rei emérito durante as súas visitas a Sanxenxo, Pedro Campos. Posteriormente, foi comprada por un grupo danés e, finalmente, foi adquirida por North Sails.

O Concello de Cuntis, nun comunicado, lamentou o peche da fábrica e asegurou que traballa para buscar alternativas e apoiar aos traballadores. "Desde o momento en que se tivo coñecemento da intención de peche por parte da dirección da empresa, o Concello de Cuntis realizou xestións para tratas de evitar esta decisión", apuntou o consistorio nun comunicado. Con todo, a pesar dos "intentos de mediar e solicitar unha reunión" cos responsables do Grupo Americano North Sails, "non foi posible reverter a decisión unilareral de trasladar a produción fóra de España".

O goberno local lamentou que esta decisión, "de carácter puramente empresarial" por parte dunha entidade privada que no seu momento recibiu axudas públicas para a súa modernización, supoña a "perda dunha unidade de produción en Cuntis". O Concello asegurou que xa se atopa traballando activamente cos propietarios da fábrica para explorar a implantación dunha nova actividade produtiva. Ademais, o Concello "colaborará estreitamente" co Goberno central e a Xunta na elaboración e implementación dun plan de empregabilidade específico para os traballadores afectados.

Fábrica North Sails de Cuntis | Fonte: CONCELLO DE CUNTIS