Os reis de España estarán en Compostela para a ofrenda ao Apóstolo no Día de Galicia
A localización da cerimonia volverá desprazarse á Igrexa de San Martiño Pinario por mor das obras da Catedral.
Por Europa Press / Redacción | SANTIAGO DE COMPOSTELA | 18/07/2020 | Actualizada ás 16:41
No ano máis difícil dos últimos para a economía e o turismo, os Reyes de España estarán tamén en Galicia dentro da súa rolda de visitas polo territorio nacional. Será o próximo 25 de xullo, coincidindo co día grande da Comunidade e para asumir en primeira persoa a Ofrenda Nacional ao Apóstolo Santiago, marcada este ano, como o resto de celebracións, pola pandemia de COVID-19.
Aínda que o primeiro Ano Santo en máis dunha década non será ata 2021, e a pesar de que a tradición marca que os monarcas asuman o papel de oferentes coincidindo co Xacobeo, esta será a segunda ocasión na que Felipe VI realizará a tradicional Ofrenda, un papel que xa exerceu en 2014, pouco despois da súa coroación, como homenaxe ás vítimas do accidente ferroviario de Angrois, que tivera lugar un ano antes e que motivou a suspensión da Ofrenda de 2013.
No ano 2010 foi o seu pai, o agora rei emérito, Juan Carlos I, o que se encargou deste labor, algo que fixo todos os Anos Santos desde a súa coroación --1976, 1982, 1993, 1999 e 2004--.
Aínda que o espírito da Ofrenda será o mesmo, nesta ocasión, a celebración virá marcada por moitos cambios. Entre eles, probablemente, a localización, xa que volverá desprazarse á Igrexa de San Martiño Pinario por mor das obras da Catedral. Tamén os aforamentos estarán afectados e imperará a distancia de seguridade mesmo para os curiosos que o vindeiro sábado queiran achegase á zona vella de Santiago para saudar ás súas maxestades.
PERSONALIDADES POLÍTICAS
Fóra do Ano Santo --e do ano 2014, no que Felipe VI quixo exercer este labor--, en cada Ofrenda, a Casa Real designa un delegado rexio entre as personalidades políticas da Comunidade, que desempeña o papel de oferente.
Remontando 20 anos a celebración, no 2000 exerceu esta función por delegación real o entón presidente da Xunta, Manuel Fraga, mentres que o alcalde compostelán foi a personalidade elixida en 2001, 2005 e 2008.
A infanta Cristina, pola súa banda, realizou a ofrenda no ano 2002 e o entón presidente do Parlamento, José María García Leira, encargouse en 2003. En 2007 foi a súa homóloga na Cámara autonómica Dolores Villarino, e un ano antes, en 2006, outro presidente autonómico, Emilio Pérez Touriño.
O actual presidente da Xunta, Alberto Núñez Feijóo, exerceu como delegado rexio nos anos 2009, 2015, e 2017. Fora designado tamén para a Ofrenda de 2013, que non chegou a celebrarse polo accidente de Angrois.
Dous presidentes do Parlamento --Pilar Rojo e Miguel Santalices-- foron designados os anos 2011, no caso da primeira, e 2016 e 2018, mentres que en 2012 exerceu este papel o entón alcalde popular da cidade, Anxo Currás. O ano pasado repetiu esta función o rexedor Xosé Sánchez Bugallo, que volveu á Alcaldía tras vencer nas municipais de 2019.
A Ofrenda Nacional ao Apóstolo Santiago foi instituida en 1643 por Felipe IV e, ao longo dos anos, mantívose a tradición de que reis, xefes de Estado ou personalidades coas máis altas responsabilidades rendan homenaxe ao Patrón das Españas para pedir a súa intercesión en asuntos de actualidade ou de preocupación colectiva.
