Sabucedo non celebrará a súa tradicional Rapa das Bestas por seguridade sanitaria
O debate centrouse entre a cancelación ou un formato de curros privados, pero a maioría dos participantes vían moi complicado, asegura a organización, controlar a afluencia e garantir a seguridade sanitaria.
Por Europa Press / Redacción | SANTIAGO DE COMPOSTELA | 18/07/2020 | Actualizada ás 20:28
A parroquia de Sabucedo, na Estrada, celebrou na tarde deste sábado, na Carballeira do Campo do Medio, unha asemblea veciñal que contou coa participación de máis dun centenar de veciños e na que se decidiu, "por ampla maioría", a suspensión definitiva da Rapa das Bestas 2020 por motivos de seguridade sanitaria.
"Os veciños consideraron que hai que actuar con responsabilidade para preservar a saúde e non hai que correr riscos innecesarios que poidan facer que xurda un rebrote", indicou o presidente da asociación Rapa das Bestas, Paulo Vicente.
"Tomamos unha decisión das máis difíciles, e non pola festa, senón polo coidado das 'bestas', que para nós son a maior das prioridades, pero só por baixo da saúde da xente", engadiu, antes de agradecer o exercicio de "responsabilidade, participación, democracia e confrontación de ideas distintas da parroquia".
Segundo subliñou, este sábado os veciños da parroquia demostraron "unha madurez e un debate enriquecedor e diverso" que lle fan sentir "moi orgulloso de Sabucedo".
A directiva expuxo aos veciños distintas alternativas e que abarcaban desde a suspensión definitiva á celebración dunha rapa pechada sen público ou con certo aforamento, establecéndose nestes dous últimos casos uns protocolos sanitarios que incluían PCR para os encargados de realizar rápaa, quen fan o traballo no monte e os demais colaboradores.
Finalmente, o debate centrouse entre a cancelación ou un formato de curros privados, pero a maioría dos participantes vían moi complicado, asegura a organización, controlar a afluencia e garantir a seguridade sanitaria.
COIDADO DOS CABALOS
Tras a votación, que tamén serviu para cancelar a Festa do San Lourenzo en agosto, a xunta directiva expuxo a necesidade de que todos os veciños intensifiquen a súa participación nos traballos de coidado dos cabalos no monte, especialmente nos fins de semana, a pesar de que certas tarefas serán inviables, xa que só é posible acometelas nos curros.
"Este ano será un pouco especial e imos despregar máis traballo para exercer un maior control sobre as mandas, que non se poderán beneficiar da necesaria desparasitación e outros labores que facemos nos curros, pero cremos que un ano poden aguantalo, porque agora a prioridade é a saúde de todos", concluíu Paulo Vicente.
