Jácome declara no xulgado por un delito de inxurias a un traballador municipal
O alcalde acudiu ao xulgado acompañado do seu avogado, sen facer declaracións aos medios
Por Europa Press / Redacción | OURENSE | 27/11/2024 | Actualizada ás 19:02
O alcalde de Ourense, Gonzalo Pérez Jacome, declarou, este mércores, no Xulgado de Instrución Número 2 de Ourense como investigado por un delito de inxurias a un traballador municipal.
Os feitos ocorreron en setembro de 2023, cando o rexedor publicou en redes sociais un comentario, desde a súa conta, cunha foto do traballador subtraída do seu Facebook --unha imaxe que difundiu sen autorización-- e á que engadiu un comentario no que reprochaba que o traballador "non fichaba" a través do sistema de control horario do Concello. Nesa mesma publicación o rexedor aludía que mirara o historial do funcionario no programa para ter esta información. O traballador atopábase de baixa e por iso non fichara. A postura do alcalde é que descoñecía ese dato.
O alcalde acudiu ao xulgado acompañado do seu avogado, sen facer declaracións aos medios. Con todo, o representante da acusación particular detallou que o alcalde se acolleu unicamente a contestar a preguntas do seu avogado e da xuíza. Segundo trasladou o avogado da acusación particular, o alcalde detallou ante a xuíza que foi o autor da publicación e explicou que "como máximo responsable do concello" ten acceso aos datos dos traballadores.
O seu defensa, engadiu o avogado do querellante, é que a publicación "é unha crítica e non unha inxuria" a un representante sindical, xa que o traballador é tamén delegado sindical de Comisións Obreiras no concello. No entanto, o letrado aclara que na publicación mencionada "fala textualmente de traballador do concello".
Para a acusación particular "será obxecto de decisión xudicial" que unha autoridade municipal publique datos relativos aos traballadores e entende que "a declaración do querellado vén confirmar os extremos da querela".
A publicación foi eliminada "dous meses" despois, pero para a acusación particular isto "non debería supor unha atenuante". "Xa estaba feito o dano contra a dignidade da persoa e o traballador, mostra diso son as 500 publicacións que se fixeron, que denigraron ao meu representado", apuntou o avogado.
"Cando se insinúa que alguén é un vago e non cumpre co seu traballo a calquera nos afectaría gravemente", expresou o avogado, á vez que pediu que se "depuren responsabilidades", xa que "non se pode permitir" que o máximo representante dun concello "dirixa comentarios e publique expresións de tal calado". "Chamar 'personaxe' a un empregado do concello parece que non é o termo máis adecuado", reprocha o avogado.
A acusación particular considera que o alcalde tamén incorreu nun delito de revelación de segredos e nun delito contra a integridade moral, pola exposición pública do prexudicado a través do comentario presuntamente difamatorio. Con todo, a maxistrada entende a querela por inxurias graves, pero desestima a solicitude dos outros dous delitos. Por iso, a acusación xa avanzou que presentará un recurso.
