SOS Sanidade Pública denuncia a "precariedade" en Pneumoloxía do CHUP onde hai 33 profesionais illados
Para a Plataforma pola sanidade pública "non é momento de mobilizarse, pero si de esixir á Administración que cumpra coa súa obrigación e dispoña as solucións necesarias"
Por Europa Press / Redacción | SANTIAGO DE COMPOSTELA | 18/08/2020 | Actualizada ás 17:30
O portavoz de SOS Sanidade Pública, Manuel Martín, mostrou a "gran preocupación" das organizacións integradas nesta plataforma pola situación de "precariedade" do Servizo de Pneumoloxía do Complexo Hospitalario Universitario de Pontevedra, onde o protocolo preventivo COVID da área Sanitaria de Pontevedra e O Salnés mantén en corentena a 33 profesionais.
"Hai tres médicos de baixa por contacto co coronavirus" e, engadido aos períodos vacacionais, "só hai dispoñible un neumólogo en planta e outro para o resto", precisou Martín, insistindo en que se trata dunha situación "tremendamente preocupante". Por iso, expuxo as posibilidades de "cambiar os protocolos asistenciais ou incorporar novos profesionais".
Para Manuel Martín "non é momento de mobilizarse, pero si de esixir á Administración que cumpra coa súa obrigación e dispoña as solucións necesarias". O representante de SOS Sanidade Pública cuestionou o funcionamento do servizo "se empezan a chegar pacientes con problemas respiratorios e non hai recursos, apenas".
"Non queremos causar alarma social pero a poboación ten dereito a coñecer a realidade", precisou Martín. Así, entre as repercusións destas baixas na atención do servizo podería atoparse o protocolo de "vía rápida" para pacientes susceptibles de padecer cancro de pulmón. "Cando se ten constancia de que pode haber ese diagnóstico dáselle acceso practicamente inmediato ás probas", explicou Manuel Martín.
"Non temos constancia de que se paralizou esa atención e o acceso ás probas diagnósticas, pero non sabemos se se poderá aplicar ese protocolo", cuestionou. En caso do seu peche, "pode carrexar problemas serios de saúde", alertou.
Así, o portavoz de SOS Sanidade Pública urxiu á Consellería de Sanidade a "pór a disposición todos os medios de vixilancia" para atallar os casos de COVID. "É prioritario que a xente non se contamine", sinalou, "pero a asistencia é un dereito", en alusión ás limitacións á atención nos centros de saúde, polo que reclamou "reabrir a Atención Primaria" e axilizar o labor hospitalario. "Nos hospitais hai listas de espera que non sabemos como serán de grandes", concluíu.
