Investigadoras da USC crean un novo sistema extractivo para aproveitar mellor a microalga de máis produción
O traballo explica a revalorización desta microalga mediante a obtención de extractos bioactivos sinérgicos e modifica o enfoque actual de extracción "unidireccional de compostos carotenoides".
Por Europa Press / Redacción | SANTIAGO DE COMPOSTELA | 27/08/2020 | Actualizada ás 19:19
Científicas da Universidade de Santiago de Compostela (USC) desenvolveron un sistema extractivo para a microalga Haematococcus pluvialis, unha das de maior produción comercial, que é escalable, reduce a cadea de procesos de refinación e aproveita máis dun 90 por cento da materia orgánica que quedaba desatendida ata agora.
A USC explicou nun comunicado este xoves que esta microalga ten unha gran concentración de astaxantina, unha sustancia con actividade antioxidante que se usa como complemento alimenticio e colorante natural para o consumo humano. Ata agora, a explotación centrábase na astaxantina e non aproveitaba o "potencial abanico" de compostos bioactivos que lle dan un "carácter sinérgico" ao produto desta microalga.
Así, as investigadoras Aly Castelo, Carmen García-Jares e Marta Lores, do departamento de Química Analítica da USC; en colaboración coa profesora Sarah Fiol, do departamento de Edafoloxía e Química Agrícola; a profesora Ana Otero, do departamento de Microbiología e Parasitología; e Simón Pereira, responsable de I+D da empresa holandesa Astaco Technologies, acaban de publicar na revista RSC Advances o seu estudo.
O traballo explica a revalorización desta microalga mediante a obtención de extractos bioactivos sinérgicos e modifica o enfoque actual de extracción "unidireccional de compostos carotenoides". Propón técnicas sustentables e disolventes non tóxicos para obter un extracto "máis complexo e rico en compostos bioactivos".
As investigadoras explican que os métodos habituais necesitan "altos requirimentos enerxéticos" e engaden unha serie de procesos antes e despois do procesado para illar un único composto, a astaxantina. O residuo "aínda retén un elevado potencial bioactivo".
Ademais, o traballo logrou a identificación de tres compostos "non caracterizados previamente nos extractos desta alga", o que dá paso á procura de novas sustancias. Na actualidade, as científicas responsables do estudo traballan para optimizar e escalar o método extractivo proposto para a súa aplicación a escala comercial.
