18 anos sen Vidal Bolaño, o Chekhov galego vetado pola Xunta de Fernández Albor

Roberto Vidal Bolaño (1950-2002) faleceu nun mal día para ser lembrado. Comparte efeméride con Salvador Allende, os falecidos no 11S e, por riba, finou no Día de Cataluña, escollido para as multitudinarias diadas en defensa da independencia catalá. Estas vicisitudes non impiden que hoxe, a 18 anos anos da súa morte, sexan moitos os que traen ao recordo a enorme contribución dun artista polifacético e maldito, sempre cigarro en man.

As achegas de Vidal Bolaño á literatura galega deben ser comprendidas en clave dramática. Actor, escritor, escenógrafo, iluminador... o compostelán exerceu como principal impulsor do teatro do século XX en Galicia, chegando a conformar a primeira compañía profesional do país, o Grupo Antroido. Bolaño decidiuse lanzarse á profesionalización logo de ser despedido do posto que ostentaba nun banco de Santiago.

Nese momento comezaría unha longa carreira truncada antes de tempo polo hábito tabaqueiro do autor, que faleceu de cancro de pulmón con só 52 anos. A publicación de obras como Laudamuco, señor de ningures, As actas escuras, Criaturas e Saxo Tenor valéronlle múltiples recoñecementos que foron paralelos á súa implicación en dotar á dramaturxia galega dunhas institucións á altura.

VETADO POLA XUNTA

Precisamente, Vidal Bolaño sería un dos principais impulsores do Centro Dramático Galego, fundado en 1984. O compostelán permacería vencellado á institución ata que, pouco despois, unhas polémicas declaracións sobre a Consellería de Cultura de Fernández Albor provocaron que a Xunta vetara todas as súas colaboracións co Centro.

Multitude de tuiteiros aproveitaron a efeméride para lembrar a contribución e o enorme papel dunha figura clave na literatura galega do século XX.

Dezaoito anos sen Roberto Vidal Bolaño, e nós sen maioría de idade.
Polo menos, lembramos a Allende, a Unidade Popular e a República de Cataluña.
Saúde, Roberto! pic.twitter.com/oQJSpq1DfS

— Antón Dobao 🔻 (@AntonDobao) September 11, 2020

No cabodano de Roberto Vidal Bolaño, lembramos o traballo que fixemos na @BUSCUSC no ano no que se lle dedicou o #DíadasLetrasGalegas. Foi o primeiro blog dedicado a homenaxeados nas Letras e témoslle moito agarimo.https://t.co/lhs5Kf4D8H pic.twitter.com/FAMrVHIcrL

— Biblioteca - USC (@BUSCUSC) September 11, 2020

Dezaoito anos sen Roberto Vidal Bolaño e seguímolo botando en falta pic.twitter.com/XD5GrQMEKy

— chevereteatro (@chevereteatro) September 11, 2020

#Taldíacomahoxe, o 11 de setembro de 2002, finaba en Santiago de Compostela o dramaturgo Roberto Vidal Bolaño. O 'BRAG' 374 recompila todas as alocucións do Día das #LetrasGalegas 2013 dedicado á sú figura e do simposio que profundou na súa obra: https://t.co/tPBPL6M7pn pic.twitter.com/N4ZfMr2kbg

— Real Academia Galega (@AcademiaGalega) September 11, 2020