A nai de Ribeira que pariu na súa casa interpón unha queixa contra a xinecóloga do hospital do Barbanza
Andrea Vila, á que lle fixeron a proba do covid tras dar a luz, di non ter recibido explicacións sobre os motivos de non poder ingresar no centro hospitalario.
Por Europa Press / Redacción | SANTIAGO DE COMPOSTELA | 09/11/2020 | Actualizada ás 18:44
A nai de Ribeira que deu a luz na súa casa tras ser enviada desde o hospital do Barbanza, que pertence á área sanitaria de Santiago de Compostela, interpuxo unha queixa no centro contra a xinecóloga que a explorou e a enviou de volta ao seu domicilio.
Polo momento, non lle deron "ningunha" explicación do ocorrido e tampouco lle pediron desculpas polo ocorrido: "non". A través dos medios a dirección do hospital manifestou que "lamenta" a situación e que "está a disposición da familia para o que necesite".
Tras dar a luz na súa casa en presenza dos seus fillos de 4 anos e 20 meses, Andrea Vila, á que lle fixeron a proba do coronavirus despois de dar a luz, segue ingresada no hospital xunto ao seu pequeno recentemente nado, que necesita antibiótico pola infección que colleu no parto, segundo relatou esta muller. Así, aínda segue ingresado coa vía posta e á espera dos resultados das probas que levaron a analizar a Santiago de Compostela.
Na mañá deste luns, a muller puxo unha queixa en atención ao paciente polo ocorrido, xa que desde o venres o rexistro físico non estaba operativo. Andrea Vila permanece na habitación co seu pequeno, ao que lle dá lactación materna.
Segundo relatou, chegou ao hospital porque sentía contraccións de parto, despois de que a súa nai acudise ao seu domicilio para quedar cos seus outros dous fillos menores. Tras a exploración no hospital --onde acudiu sobre as 10 da mañá-- por parte da xinecóloga contra a que puxo a queixa, enviárona de novo a domicilio despois de que o médico que a explorou lle dixese que "non eran contraccións de parto".
"Teño dous nenos, como se non soubese diferenciar o que son contraccións de parto!", sinalou Andrea Vila, quen indicou que pasadas as 11 da mañá xa de volta en casa deu a luz no seu domicilio.
A experiencia non acabou aí, xa que a ambulancia non daba co domicilio da muller, que tivo que romper ela mesma a bolsa amniótica, e foi o seu marido, ao que tivo que chamar porque estaba a traballar, o que tivo que saír ao paso dos sanitarios para indicar onde estaba o lugar.
"MOITAS QUEIXAS E ERROS"
Unha das cuestións que máis lle preocupa, á parte do seu pequeno recentemente nado, é o seu fillo maior, que presenciou o parto e que agora "ten pesadelos" e trata de porse en contacto con ela cada pouco tempo para "preguntar se está viva". "Polo menos que non volva ocorrer", manifestou, en relación á súa decisión de queixarse e estudar interpor unha denuncia legal polo ocorrido.
Na súa queixa, a nai denuncia "faltas de respecto reiteradas" cara a ela e explica que a enviou para casa con afirmacións como que "era cousa dela" que estivese de parto e as súas dores. "Medo, incerteza e o risco que corre a miña vida percorren os meus pensamentos en cada instante", sinala no seu escrito ante o Sergas, no que fai constar que son "moitas as queixas e erros" que refiren pacientes cara a ela.
Preguntada por este extremo, a xerencia da área sanitaria de Santiago-Barbanza non aclarou se se abriu un expediente interno para coñecer o ocorrido e tampouco se a persoa á que se refire a queixa acumula outros avisos deste tipo.
O HOSPITAL NON LLE DEU NINGUNHA EXPLICACIÓN
Sobre o ocorrido, a dirección do hospital, que segundo a muller non lle deu ningunha explicación, xustifica, nunha resposta aos medios de comunicación, o procedemento no caso dunha muller que entra no hospital por urxencias por parto.
"Hai situacións nas que, a pesar de que a paciente sexa correctamente valorada e explorada por persoal do servizo de xinecoloxía e se o rexistro de actividade do feto e exploración non presenta, nese momento, dinámica de parto, a indicación é ir a domicilio" se está preto do centro hospitalario, coa "recomendación de que se presenta cambios no seu estado volva ao hospital", sinala, aínda que non aclara se encaixa este marco no caso de Andrea Vila.
A dirección do hospital tamén engade que "en ocasións, pódese producir un parto precipitado nunha paciente multípara". A muller que deu a luz na súa casa ten dous fillos e acudiu dúas horas despois de chamar á súa nai para que coidase ás súas outros dous vástagos porque detectara as contraccións de parto, segundo relatou.
